الأحد، 10 أبريل، 2011

القمص زكريا بطرس ، من هو ، لماذا يهاجم الاسلام ، وما موقفى منه ؟

القمص زكريا بطرس
تنبيـــــــــــــــــــــــه : -
 صديقى القارىء ، أدعوك لقراءة هذا المقال الى آخره ، فأنت كما تعرف ، ليس محب هو الذى يسوق لدينه أو يشتم أديان الآخرين ويسبها ، وان رأيتنى أخطأت فى شىء لتذكره فى التعليق ، وأعلم تماما أننى سأحاول بقدر الامكان الحديث بمضوعية وحيادية .
كنت قد أشرت سابقا بأننى لن أتحدث ثانية فى موضوع الوحدة الوطنية ، لكننى أقول اليوم أنه ربما أتحدث فيه لاحقا وتكون هذه الفترة مجرد هدنة . لكن اليوم - على أى حال - لابد لى ولكم - على ما أظن - من الوقوف على بعض الأشياء التى تغضب البعض وتؤرق البعض الآخر ، وسنبدأ اليوم بالمناورات التى تحملها الموجات ، وخصوصا الأقمار الصناعية ، وبالتحديد برامج وقنوات القمص زكريا بطرس . وقبل أن نقول أى شىء عن الرجل ، فلنستعرض معا ما قرأته فى أحد المواقع المسيحية على لسانه ، وللأمانة وأيضا للتأكد فالموضوع الأصلى هنا
الجزء الأول من المقال يقول : -
ويقول أبونا ذكريا في سنة 48 كان لي أخ الكبير البكري اسمه فؤاد بطرس حنين عنده عمل حر وكان يروح يوعظ في الكنائس وفي يوم وهو رايح قرية من القرى يعظ فيها فمسكوه جماعة الإخوان المسلمين سنة 48 وجروه داخل الدرة وضربوه بالبلط وبعدين قطعوا لسانه علشان خاطر لو كان لسه فيه روح ما يعرفش يخبر عنهم لأنه كان شافهم ... وطرحوه على الأرض علشان يثبتوه ما يجريش وراهم ولا يزحف بره الذرة لحد ما تطلع روحه، دخًلوا سيخ حديد في أذنه وخرج  من أذنه الثانية وهو نائم على الأرض وغرسوه في قلب الأرض علشان ما يتحركش ... انتقل شهيد من أجل اسم المسيح وكلمة الله طبعا ما اتكونش عندي رد فعل عنيف ضد المسلمين بالعكس أنا بحب المسلمين حب شديد جدا وبأشفق عليهم مش خوف من الجماعات دي لكن إشفاق
فى الحقيقة ما قاله هنا القمص زكريا بطرس صعب على العين والدماغ والأذن تصديقه ان كنت مسلما ، أما أن كنت مسيحيا ، فستتقبله بسرعة ، فأنا مثلا أعرف قس شهيد اليوم يعملون له تذكار سنويا بالقرية التى ولد فيها الشيخ سيد قطب ، حيث قتل بواسطة بعض المتطرفين الاسلاميين باكرا جدا ، يوم قداس العيد على ما أفتكر ، كان هذا فى التسعينيات ، على فكرة أنا أقول شيئا واثق منه ، لأننى قلت أكثر من مرة أن قرية موشا ( سابقة الذكر والتى قلت أنه ولد فيها الشيخ سيد قطب أيضا ) لا تبعد أكثر من ثلاثة كيلومترات من قريتى ( قرية ريفا ) .  
هذا القس يدعى أبونا مرقس وهو غير أبونا داود المذبوح حديثا بقرية شطب ، والتى عندما أريد الذهاب اليها لا أقطع من مسافات ، الا  ما بين قريتى وقرية موشا ومن ثم ما بين قرية موشا وهذه القرية ، أى أن قرية موشا عبارة عن حلقة الوصل هنا . 
بالطبع فى كلام القمص السابق استنتاجات كثيرة فهو يقول : فمسكوه جماعة الإخوان المسلمين سنة 48  وربما الحقيقة أنه كان أحدا آخر غير الأخوان هو الفاعل ،  وأيضا : وجروه داخل الدرة وضربوه بالبلط وبعدين قطعوا لسانه علشان خاطر لو كان لسه فيه روح ما يعرفش يخبر عنهم لأنه كان شافهم ... وهذا الكلام مستنتج بالطبع من الحالة الأخيرة التى ظهر عليها أخوه قبل الدفن بالطبع .
وأشياء أخرى أيضا ، المهم الجزء الثانى يقول : - 
إخوانجى مدرس متعصب
حصلت لي سنة 1950 كنت يومها في ثالثة ثانوي اللي هي كانت توجيهي ... كان عندي مدرس أول اللغة العربية  اسمه فهمي القراقصي دة كان رئيس شعبة الأخوان المسلمين في البحيرة فكان يوقفني في حصة العربي ويسألني أسئلة محرجة ؟ إيه الثلاث آلهة اللي انتم بتؤمنوا بيها دي انتم بتعبدوا إنسان وهكذا يعني .. فالحاجات دي لشاب صغير حوالي 15، 16 سنة وكان لسؤاله لمثل هذه الأسئلة هو الدافع لى للتعمق والدراسة، فخلاني أبحث ازاي أرد يعني على الاتهامات دي ومن هنا جاء باب البحث الدقيق وقراءة القرآن علشان خاطر أقدر أرد .
الحادثة الثالثة : في احداث علاقتي بالمسلمين مع الشيخ ميخائيل منصور وكامل منصور ثم استشهاد أخويا الكبير وأنا ورثت الكتاب المقدس ..
الحادثة الثالثة اللي هي للأستاذ القراقصي الأخوان المسلمين
أما هنا فليس بالمستبعد أن يحدث هذا ، فقد حدث لى شخصيا مرات عديدة كأى مسيحى فى مصر على ما أظن ، لكن ليس من المدرسين بالطبع ، والمفارقة هنا أن المدرس الوحيد الذى ما زلت أفرح لمجرد رؤيته فى الشارع هو مدرس اللغة العربية ، والذى غالبا ما أراه ماشيا فى الشارع وهو يعلم أبنه الصغير ( ٦ سنوات ) شيئا من القرآن ، فى الحقيقة ، ليت كل المسلمين مثله !! عموما هذا الجزء لا يحتاج لتفسير ، أو اننى لا أملك له :)
أما الجزء الثالث : -   
أبونا زكريا بطرس والكاتب الكبير توفيق الحكيم
يعني أنا بعد الراجل دة ابتديت أدرس ، وأول ما اترسمت
كاهن سنة 1959 كتبت سلسلة الكتب والأبحاث الإسلامية والدفاعيات : الله واحد في ثالوث - المسيح ابن الله -  صلب المسيح - وحتمية الفداء -
صحة الكتاب المقدس وعدم تحريفه . فكتبتهم أول ما اترسمت كاهن وملكت أن أقدر أكتب فكتبت الكتب دي .. طبعا الكتب دي اتسجنت من أجلها ، وكلها كانت دفاعيات . يعني كنت باقرأ كتب سرجيوس وأخد منها دفاعيات .. أبونا بولس باسيلي جه متأخر وكتب بنفس الأسلوب يعني مثلا كتب فيها أيضا  كما كنا نستطيع نفعله واحنا في مصر ، وكل ما كنا نملكه من كلام أو مساحة حرية نقدر نتكلم فيها لحد ما حصل أنني تقابلت مع الأستاذ توفيق الحكيم ... جه توفيق الحكيم حضر عندي الوعظ ودعاني أن أزوره في البيت فصارت صداقة .. توفيق الحكيم دفعني في اتجاه جديد اللي أنا ماشي عليه لحد دلوقتي وهو إنه طلعلي إن القرآن كتاب باطل (محمد نبي كاذب)  فابتدأ يوجه نظري إلى ما يعرف بالناسخ والمنسوخ أي تناقضات القرآن كلمني وقعد يتكلم ولمدة ثلاث ساعات في مواضيع شتى كنت خايف اطلع قلم وأكتبها أحسن يمسك فطلبت من ربنا أنه يفكرني بكل حاجة فلما نزلت ركبت عربيتي ودخلت في شارع  جانبي نورت النور بتاع العربية وقعدت أكتب
هنا لا أجد أكثر مما قاله عظيم الفلاسفة العرب الدكتور مصطفى محمود أو العقاد ( لا أتذكر بالضبط ) على بعض مثقفى مصر مثل نجيب محفوظ وطه حسين ، وآخرين كثيرين ، ربما منهم توفيق الحكيم وربما لا بأنهم حادوا عن صحيح الدين ، وكانت كتابتهم مليئة بالمغالطات ، آسف لعدم التذكر جيدا ، لكن حتى لو لم يكن توفيق الحكيم منهم ، فليس بالمستبعد .
عزيزى القارىء قبل أن تقول محب هذا يريد أن يقنعنا بشىء ما ، فأريد أن أطمئنك بأننى أصلا لا أعرف هل فعلا هذا خرج من لسان القمص زكريا بطرس أم لا ، لأن هذا الكلام  لم يذكر الا فى موقع واحد فقط على ما أدرى ، وبفرض أن القمص ذكر هذا الكلام فعلا ، فأنا لا أضمن لك مصداقيته من عدمها . هذه التدوينة كبر طولها وكثر كلامها ، لذا فلنكمل حديثنا فى وقت آخر ان شاء الله ، وسأحاول أن أضح موقفى منه ووجهة نظرى ، كما سأتى ببعض من سيرته ، والى هذا الحين أتمنى لك حياة يومية هانئة .
مع تحياتى : المحب لك دائما / محب روفائيل .

هناك 32 تعليقًا:

  1. يعني سبتنا متعلقين يا عم :)
    بص يا محب أنا مش هثبت أو هنكر الكلام
    لأني زيك معرفشي .
    وزمان غير دلوقتي في الفكر الإنساني
    والناسخ والمنسوخ عموما إلي اتكلم عليهم القمص زكريا بطرس
    هقولك مثال أنا عارفة
    احنا في الإسلام اتحرم الخمر علي مراحل
    1- بدأ بالعتاب ( يسألونك عن الخمر والميسر قل فيهما اثم كبير ومنافع للناس واثمهما اكبر من نفعهما )
    2- ثم النهي عن الصلاة في حالة سكر ( يسألونك عن الخمر والميسر قل فيهما اثم كبير ومنافع للناس واثمهما اكبر من نفعهما )
    3- ثم الإجتناب أو الأمر ( يا ايها الذين آمنوا انما الخمر والميسر والانصاب والازلام رجس من عمل الشيطان فاجتنبوه لعلكم تفلحون انما يريد الشيطان ان يوقع بينكم العداوة والبغضاء في الخمر والميسر ويصدكم عن ذكر الله وعن الصلاة فهل انتم منتهون )
    فالثانية نسخت الأولي والثالثة نسخت الثانية ولو كان الأمر نزل مباشر للذين أسلموا لكن ادمان الخمر سيطر علي الأمر الإلهي . فالناسخ والمنسوخ مفهوش تعارض .

    ممكن تشوفها باستساع في جوجل اجابات
    http://ejabat.google.com/ejabat/thread?tid=275aea2b75fe1c6e

    مستني الجزء التاني عشان نكمل تحياتي ليكي يا محب

    ردحذف
  2. مش عارف القوالب بتاعة المدونة تاعبانى ليه كده يا ريس ، شفت الغباء ، أول مرة تزورنى وبدل ماضحك فى وشك أبوز :):):):)
    وصلت فكرتك جدا يا بسام على فكرة ، وشكرا على التوضيح ، على فكرة أنا بشكرك فعلا ، مش بقولك شكرا وعلى الجنب التانى بنفخ ، الكلام ده مهم جدا جدا بالنسبة لى ، لأن القرآن أولا وأخيرا ضمن ثقافتى ، ورجلى فوق رقبتى ده طبعا أن مفهمتش الكلام ده وأخذت بيه طواعية :)
    علشان كده أنا بتابع ما لا يقل عن خمس أو ست مدونات اسلامية الطابع وبحتة كمان لكن معتدلة طبعا .

    شكرا على تنوير المدونة ، وان شاء ربك هنعيش ونقرا الجزء التانى .

    تحياتى ، المهم أنت عامل أيه فى المعهد والعيال ؟
    :):):):):)

    ردحذف
  3. الأخ : محب
    إذا كان ماقاله القس عن مقتل شقيقه بهذه الطريقة البشعة حقيقى أقول لك هؤلاء ليسوا بمسلمين بمعنى يعلمون الإسلام على حقيقته ومبادئه السامية..وإن كنت أشك فى أن الإخوان هم من فعلوا ذلك وهذا إذا سلمنا بأن الحادثة صادقة...
    تعاليم الإسلام تقول _ وهذا فى الحروب_ إذا قتلتم فأحسنوا القتل ولاتمثلوا..
    حتى ياأخى عن ذبح الحيوان هناك شروط للذبح حتى لايتأذى الحيوان فما بالك بالإنسان؟
    بالنسبة للناسخ والمنسوخ أعتقد أن الأخ :MR.PRESIDENT
    أوضح بما فيه الكفاية.
    تقبل تقديرى واحترامى

    ردحذف
  4. الأستاذ العزيز محمد الجرايحى

    سبق وأن قلت أن لى أصدقاء أزهريين ، رغم أن أحدهم كان مضطهدا لى ، وبين يوم وليلة تغيرت معاملته تجاهى ، كيف ؟ لا أعرف ولا أريد أن أعرف .

    فلنفترض أن كلام القمص كذب أو أنه لم يقله من الأساس ، ماذا عن القسيسين الذين ماتا عندنا فى أسيوط ؟

    أنا لا أريد أن أتجادل بشأن شىء ، الا أننى أريد أن أقول هذا من ضمن أسباب كثيرة لمحاربة الأقباط فكرة حكم الاسلاميين .

    كما لا تتضايق يا أستاذى ، انهم ليسوا بقلة ، فكل يوم نسمع عن اختطاف قاصر ، مقتل قس ، حرق كنيسة ، هدمها ، اغتصاب فتاة ، وأشياء أخرى كثيرة ، كل هذا الكلام يزيد مرارتى عند كتابته وتذكره وقراءته ، ولكن لا بأس .

    أستاذ محمد ، أنت مثلا ، صورتك ليست واضحة بما فيه الكفاية ، فلنفترض أننى قابلتك يوما ما ( وهو يوم المنى بالطبع ) قرأت لك سابقا عن أنك ذو لحية ، هذا لا يخيفنى منك لأنى أحبك فى الله كما يقول المسلمون والمسيحيون ، لكننى لو رأيتك فى الشارع ، وفى أحسن الأحوال شككت فى أن من أمامى هو أنت ، لن أتحدث معك ، لأنه أما أن أكون متأكدا من أنك هو ، أو بلاها كما يقولون عندنا فى الصعيد .

    أقصد أنها ستكون مغامرة أن ذهبت لذى لحية وقلت له أأنت الأستاذ محمد الجرايحى ؟

    لماذا كلامى ، لأنهم ليسوا بقلة ، لكن هناك من هو حميد الأخلاق مثلك ، قرأت مؤخرا يوميات لشاب قبطى هاجم فيها المسيحيون والمسلمون معا أو فلنقل أنه كان ينتقد العلاقة الزائفة بينهم ( ملحوظة لم يكن هذا هو الموضوع الأساسى ليومياته ) ، فقال : مرة مكنتش حالق دقنى ونزلت الشارع وركبت الأتوبيس وركب جنبى شاب بلحية ، وقعد يقولى يا أخى يا أخى ، وأول ما شاف وشم الصليب الواد أتعفرت .

    فى حتة تانى فى نفس الكتاب بيقول ، لما ضاعت محفظتى وقلت عليها ربنا يعوض ، سمع التليفون ، واحد لقيهاله وشاف رقم الموبايل فى المحفظة بعد البحث والتدقيق ، المهم لما راح يقابله لقيه بدقن ، الواد استغرب جدا لأن أسمه وهو اللى ضايع منه المحفظة مسيحى بحت والراجل ده بلحية ، حاول معاه أنه ياخد مقابل ، فالشيخ مرضيش .

    كلامى ده كله على أساس انهم مش قلة ، وأنا قلتلك فى مدونتك على الشيخ اللى شال لأبويا مستلزمات البيت لأن أبويا فى يوم من الأيام كان مدرسه . يعنى من الأمثلة الحلوة اللى أعرفها والأمثلة التانية اللى ربنا يبعدنا عنهم ، أحصائياتى بتقول أنهم مش قلة .

    المختصر المفيد ، أنه مش من المستبعد أبدا ما قال القمص بخصوص أخوه ، وبخصوص ذبح الحيوان فى الاسلام فأنا أعرف قشور عنه علشان تعرف بس أن ثقافتى الاسلامية ممتازة بالنسبة لأى حد فى مكانى :):):)

    بالفعل بسام وضح كل حاجة .

    تحياتى لحضرتك

    ردحذف
  5. الأخ الكريم: محب
    أشكرلك صراحتك وموضوعيتك
    وتأكد أننى أتألم مثلك لما يحدث
    أتألم على هؤلاء المسيحيين لأنهم أرواح خلقها الله سبحانه
    وأذكر هنا موقفاً من سيرة النبى ( صلى الله عليه وسلم ) ..عندما مرت جنازة وهو جالس فقام واقفاً فقال له أحد الصحابة : إنها جنازة يهودى يارسول الله .
    فقال له النبى صلى الله عليه وسلم : أليست روح خلقها الله تعالى .....
    وأتألم أيضاً لهؤلاء المسلمين الذين ابتعدوا بتصرفاتهم عن صحيح الدين وأساءوا له.
    نسأل الله تعالى أن يبصرنا جميعاً إلى مايحب ويرضى

    وتقبل تقديرى واحترامى

    ردحذف
  6. مبروك القالب الجديد ممتاز ورائع

    ردحذف
  7. الأستاذ العزيز : محمد الجرايحى
    العفو ، على فكرة لو كنت خايف أو منافق يبقى مفتحش المدونة أحسن :):)
    أنا ماشى حسب مبدأ بيقول : أنا مدون اذن أنا شجاع :):)
    وأشكر لحضرتك مشاعرك النبيلة .
    معظمنا يسمع ويعرف أن الاسلام دين السماحة ، لكن ده مش باين لأن المفروض أن كل المسلمين يعكسوا صورة دينهم على باقى الناس والعالم ، هو فيه سماحة أيوة فى المجتمع ، وفيه تطرف برضه ، لكن زى ما بيقولوا للأسف الحسنة بتخص والسيئة بتعم ، والمثل ده على فكرة أنا بكرهه كره العمى .
    الله يبارك فى حضرتك ، على فكرة القالب ده أهداهونى المدون المتميز حسن محمد محمد صاحب مدونة فرصة باقية نافذة للنجاح ، ده كان من حوالى اسبوعين تلاتة ، بس أنا بقى عملت شاطر وقعدت أدور على قوالب أحسن ، وطبعا أعتذرتله ، الراجل قاللى عادى جدا ، المهم القوالب التانية ممشتش معايا فجبت القالب ده تانى وأنا بشكره طبعا مرة تانى هنا .
    تحياتى لحضرتك .

    ردحذف
  8. العيال تعبني :
    معلش أنا كررت الأية مرتين المفروض في أيه تانية .

    عموما أنا هتفصل أهوا من المعهد :)
    نهاية عقدي ومفيش تجديد :)
    نفسيا انا زعلان لان حاسس ان بترمي بعد ما استفادوا مني وبدون وجه حق

    ردحذف
  9. بسام ، لأ سلامتك يا ريس

    طيب بقولك مش تشوف حركة التثبيتات اللى شغالة دلوقتى ، المفروض كنت شفتها من أول ما أعلنوا عنها .

    بص متزعلش ، وقبل ما تقول أى حاجة ، قول الحمد لله أنى أديت رسالتى ، فأنا زى ما قريتلك فى مدونتك كنت بتديهم مادتك زى ما تكون لغة عربية ، يعنى معملتش زى باقى مدرسين الكمبيوتر التانيين .

    وده يكفيك فخرا بالطبع ، وان شاء الله هتلاقى معهد تانى يبقى سيد سيده :)
    تمنياتى بالنجاح والتوفيق فى حياتك اليومية والعملية .

    وأتمنى برضه أنك تكون خفيت من الدور اللى انت فيه اليومين دول .

    ردحذف
  10. زكر يا بطرس مرة واحدة و طب شوف حد تاني تدافع عنه , انت حتبقى عامل زي المسلم اللي بيدافع عن عبود الزمر بين مسلمين :)


    انا عمري مشفته ولا حتى قريتله , بيقولوا بيشتم اكتر ما بينتقد علشان كده مشغلتش بالي
    انا معتقد اعتقاد تام ان المسيحيين بيعتبروا المسلمين كفار وان نبيهم من الانبياء الكذبة الذين حذر منهم المسيح , وان القران مش كلام ربنا وان الاب والابن وروح القدس اله واحد امين , ووفاة المسيح وقيامته من بين الاموات في اليوم الثالث , وكلامه للحواريين , ومع كل ده ربنا اقر ليهم بحق الحياة وعدم قصدهم بالسوء وتركهم وما يدينون , ولا يكرهون على اعتناق الاسلام , في الدولة القديمة ده كان مقابل الجزية , وفي الدولة الحديثه بما انها مش دولة اسلامية بالمعنى الحرفي للكلمة فحقوق غير المسلمين مبنية على معاهدات واتفاقات ( انا شايف انها محتاجة اعادة صياغة لوضع حدود الواجبات والحقوق علشان نعيش بامان ومش كل يوم يطلع واحد دماغه بتوجعه يقلب البلد على بعضها ) , المهم بعد كل ده لما اسمع قس مسيحي بيتكلم عن الاسلام بشوف ان مفيش جديد الفرق انه اكثر شجاعة من الاخرين والا فالكل يعتقد نفس الشىء .
    حتقولي المفروض تسمعه علشان تحكم , اقولك اني قريت جزء كبير من العهد الجديد والرسائل وعرفت ليه المسيحين متمسكين بيه , وتيقنت مماجاء في القران عن العهد الجديد .ولقيت ان سوء التفاهم هو السبب , مش كل الانجيل محرف زي ما ناس كتيير متخيله بالعكس الجزء الاكبر من الاناجيل عبارة عن حكم ومواعظ وقصص جميلة ومؤثرة والاكتر من كده اني لقيت تشابهه غير عادي يصل احيانا لحد التطابق بين قصص انجيلية وبين احاديث نبوية ( بعض المسيحيين المتعمقين بيعتبروا ان ده سببه ان النبي اخد عن بحيرا الراهب او انه نقله من نصارى كانوا موجودين في الجزيرة العربية , بينما انا كمسلم عارف ان النبي لم يكن يعرف القراءة ولا الكتابة وانه قابل بحيرا في سن لم يكن يسمح ليه بالنقل ولمرة واحدة فقط فانا اؤمن ان سبب التشابه ان اصل الكتابين والديانتين واحد ) وده بعيد عن قصة البوس والاحضان تاعة التلفزيون اللي مبتدخلش دماغ عيل صغبر وان الخلاف في الجزئيات الاصلية ممكن يكون راجع لما سماه بعض علماء المسيحيية خطأ الكاتب ( في الترجمة من يونيانية لعبرية لقبطية لعربية ) شوف انت بقى :)وممكن يكون راجع لبعض اصحاب النوايا السيئة او اصحاب الاجندات :)


    بالمناسبة مسلمين كتيير مبيخدوش بالهم من حقيقة ان الاسلام نفى ان المسيح اتصلب , لكنه لم ينف عملية الصلب ذاتها .والفرق شاسع .

    طبعا انا اخر واحد ممكن يتكلم عن الاعتدال في البلوجر فعلشان كده لا تؤاخذني ان كان الكلام مش براعي فيه الاتيكيت :)

    ردحذف
  11. مسالة النسخ دي موجودة حتى في المسيحية نفسها , تخيل الفارق بين المحرملاات في العهد القديم وكلام المسيح عليه السلام في العهد الجديد عن حل كل شىء ( للاسف مش فاكر النص بالظبط ) بس لو انته مش عارف فعلا ممكن اجيبه ليك ,هو ده النسخ ببساطة ان فيه احكام شرعية كانت صالحة في وقت مكن الاوقات لمجموعة من البشر ولم تعد تصلح في وقت تاني فربنا غير حكمها للمجموعة التانية علشان تتوافق مع شريعتهم الجديدة ووضعهم الحالي ( مثلا الابل محرمة على اليهود ولازال المتدينيين اليهود ليهم طقوس غير عادية في الذبائح والاكل , المسحيين لا يلتزموا النصوص دي , وكذلك الطلاق مباح في اليهودية , لكنه في المسيحية لعلة الزنا فقط والديانتيين سماويتين باعتراف المسحيين , ده بيعتبر نسخ )

    غير مثال بسام طبعا اللي هو داخل في التعريف الاسلامي للمسألة .




    موضوع بقى توفيق الحكيم او غيره من الناس اللي شبهه , فاللي قال كده غالبا صادق

    وحقولك على حاجة , كتيير من المفكرين اللي سافروا برة واخدوا شهادات وخصوصا في العلوم الانسانية , والفلسفة بينظروا للمقدس في الشرق من منظور تاريخي او ادبي مش منظور ديني , ودي حقيقه بيخفيها كتيير منهم علشان ميتصادمش مع المشاعر العامة للمجتمع فميترفضش منه ويقدر يادي جزء من رسالته اللي هوه بيعتبرها مقدسه لتنوير الشرق وبعضهم لا بيعتبرها مقدسة ولا هباب بس من باب (أبجني تجدني :))وبالتالي بينتقدوه بينهم وبين بعض , قليل بس منهم اللي بيبقوا مستبيعيين
    زي نوال السعداوي مثلا هما اللي بيصرحوا باللي في قلبهم , لكن للاسف كلهم وبلا استثناء بيقولوا كل اللي نفسهم فيه بدون رغبة في السماع , لانهم بيعتبروا انهم الاعلى والاعلم وانهم يفهموا الناس اللي مش فاهمة دون وضع في الاعتبار ولو لجزء من المليون ان هما فعلا اللي ممكن يكونوا مش فاهمين

    حتقولي طيب ممكن انت فعلا اللي مش فاهم . حقولك حاجة اتعلمتها من القران وملقتش مسلمين كتيير بيتكلموا فيها البرهان او الدليل
    اللي يجيب دليل على انه الاقرب لله والاكثر هداية او الاصدق هو الاولى بالاتباع
    يعني الدليل اولا واخيرا اللي قول حاجة يجيب عليها دليل يعني اللي قولك الانجيل كلام ربنا نحط الانجيل في موضع النقد العلمي ونشوفه حيثبت ولا لا , واللي قول القران هو كلام ربنا , نشوف ده ممكن فعلا ولا لا علميا وادبيا وتاريخيا واللي يقول كونفشيوس كان نبي او بوذا كان ليه كتاب او انه اله نشوف الموضوع يمشي ولا ميمشيش وفي النهاية حنروح كلنا للرب الخالق علشان يحاسبنا ونعرف الحقيقة , وربنا وحده اللي يعلم هل كل واحد فينا بذل المجهود الكافي علشان يوصل للحقيقة ولا لا , لان مجرد ولادتك على دين معين مش صك رضا ونعيم دي حياة وكلنا مبتلين بوجودنا فيها مش علشان انا اتولدت مسلم يبقى الجنة مستنييني في الاخرة , لا ده لازم يصحبه عمل وحب وايمان لله الواحد الخالق , ومش علشان انت اتولدت مسيحي يكفر الاب عنك الخطيئة بقتل يسوع وانت في الاخر بردك تروح النعيم النوراني لمجرد انك اتولدت مسيحي , لا الجنة مش بشهادة الميلاد الجنة بالبحث عن الحقيقة والايمان والعمل الصالح


    ايه ر ايك يجاااااااااااااا في الكلام ده

    ردحذف
  12. @واحد من الناس
    ازيك يا دكتور أولا : أعذرنى لو رديت فى أكثر من تعليق ، لأن تعليقك كبير نسبيا لكنه ممتع فعلا .
    أنا هتكلم وهرد على اللى فاكره واللى مش فاكره يبقى فى تعليق تانى .
    بخصوص أن الجنة مش بشهادة الميلاد فأنا معاك طبعا فى الكلام ده ، ورأيى فى الكلام ده بقى فلة :)
    بخصوص أن القمص زكريا بطرس هو يعتقد كأى مسيحى أن المسلمين كفرة وأن نبيهم كذاب كما تنبأ المسيح ، أوك أنا هقولك على حاجة : فى مرة حد سأل خادم عندنا فى الكنيسة هو المسلمين هيروحوا الجنة ولا لأ ؟ على اعتبار طبعا ان المسيحيين هيروحوها حدف :) فأجابه وقاله بالتأكيد لكن مش زى المسيحيين طبعا ، الحكاية درجات هتبقى .
    الى اللقاء فى التعليق التانى :)

    ردحذف
  13. وصلت الحمد لله :)
    بخصوص الناس اللى طلعوا برة ودرسوا فأنت جبت التايهة ، أو جمعت شوية حوادث مع بعض وعملتها نظرية ، بس أنا مش هاممنى الكلام ده ، لأنى مش هتحاسب عن أى حد فيهم ، كل واحد مع نفسه ، ومحدش هيدافع عن التانى فى اليوم الأخير ، لأنه كل واحد أصلا مش هيقدر يدافع عن نفسه ، ولا أييييه ؟
    بخصوص مقالى ده ، فهو مش مرافعة ولا حاجة ، ده مجرد استعراض لمشكلة عويصة بينتج عنها أحيانا دمار وخراب ، وربما هى من أحدى مسبباته الدائمة ، أحيانا بحس أن القمص زكريا بطرس مجرد واحد عنده مشاكل نفسية ، وأحيان أخرى بحس انه فعلا خايف على المسلمين ، على كل كلامه ده بيجى بفايدة على مسلمين ( على الأقل من وجهة نظر مسيحية أو وجهة نظره) لكن زى ما قلت قبل كده بييجى بالدمار على المسيحيين ، وانتوا عندكم ناس لما بتصدق تمسك ى حاجة ، الحق يقال ولو على رقبتى سيف :)
    التعليق اللى اى هتكلم فى مسألة النسخ .

    ردحذف
  14. بجد منور يا دكتور ، استنى خلاص عملوا الشاى :)
    أما بقى موضوع النسخ فأنا هقولك على اللى بيقولوه عن الاسلام واللى حضرتك بتقوله عن المسيحية .
    أكتر حاجة أنا عن نفسى شايفها عيبة فى حق الدين الاسلامى ( ملحوظة أنا الكلام ده معرفتهوش بنفسى ، لأ أنا سمعته من آخرين للأمانة الفكرية :) أكتر حاجة شايفها عيب أنه لما كان الاسلام فى مرحلة ضعف كان القرآن بينزل بآيات تدعو للسلم والخير والحب وقبول الآخر ، وده ظهر جليا لما كانت الدعوة الاسلامية لم تخرج بعد من حدود مكة أو قريش . لكن بعد كده القرآن نزل بآيات اقتلوا وقاتلوا والكلام ده اللى بيدعو للعنف . يعنى الاسلام باختصار فى نظر اللى قالى كان خطة استراتيجية محكمة ، تتبع سياسة النفس الطويل وما شابهها من سياسات وأجندات مؤدلجة :) تأكد أنى قرفان وأنا بتكلم عن حاجة معرفهاش ، لكن انت متعرفش أن القرآن كان عندى يوما ما على الكمبيوتر ، بس أخويا مسح ال 320 جيجا كلهم لما نزلت السنة اللى فاتت :)
    أما بقى فى المسيحية فالمسيح قال : ماجئت لأنقض بل لأكمل ، وفعلا فيه آيات من التوراة والعهد القديم ، بالمنظور بتاع الاسلام لا تتماشى فعلا مع ما نادى به المسيح ، لكن وقع المصيبة أسهل بكتير مما فى الاسلام ، لأن الاسلام جماعة ( على حد قولك ) واحدة وان تعددت الأزمنة ، فهى مجرد قرون بسيطة بالنسبة للأنجيل اللى اتكتب فى 16 قرن ، أنا معنديش مرافعة أكاديمية بس أقدر أقولك أنه حتى لو اتنسخ ، فده لو كان ليه أسباب فالأسباب اللى قلتها حضرتك على القرآن تنطبق أكثر منه بمراحل على الأنجيل ، ولا أيييييه ؟
    أه ما انا كده كده عارف أن حضرتك هتقول أيه ، بس حضرتك منور القعدة بجد :)
    مش عارف كده تعليقى خلص ولا لأ ، بس كده كده هيكون فيه تعليق رابع علشان أسلم على حضرتك ب ( الى اللقاء ) فى كل الأحوال :)

    ردحذف
  15. أظن كده رديت بأختصار على كل النقاط اللى حضرتك أثرتها ، لكن مش متأكد لأن وريا حاجات كتيير قوى ، بس لو فيه استفسار تانى أو سؤال جد عما قد سأل من قبل ، فممكن حضرتك تقوله .
    الى اللقاااااء
    بس حلوة بقى دى على فكرة أحنا مش زى السعودية بنكتب كلمة رفيق مثلا رفيج ، لأ أحنا بنعتبر نفسنا كصعايدة أننا الأصل ، أيه رأيك ب(قققققققققققققق)ى :)

    ردحذف
  16. @واحد من الناس
    ازيك دكتور ، وبعد كام ساعة من تعليقاتى الأولى حسيت أن فيه حاجات مجاوبتش عليها ، فتعالى نستعرضها سوا :)
    بخصوص انك مسمعتش ولا قريت لزكريا بطرس ، فده اسمحلى غلطة منك زى اللى أنا وقعت فيها لما سمعت عن حكاية النسخ فى الاسلام بدون فحص .
    بخصوص موقفنا من الاسلام كنت قد جئت بشىء عنه فى تعليق سابق ، لكن حتى لو زى ما حضرتك بتقول كده ، فكل واحد حر فى دينه وفى تغييره ، وأنا مش عارف ليه الاسلام رغم أنه دين السماحة بيقتل المرتدين ؟ عموما فى آية بتقول ليس بأحد غيره الخلاص يقصد بكده المسيح ، لكننا بنؤمن أن المسيح هو الله نفسه ، وانتوا بتعبدوا الله ، فعلشان كده من وجهة نظرى انتوا معانا فى الملكوت / الجنة ان شاء الله :)
    عموما انا أكتر دليل عندى على عدم تحريف الانجيل هو قولكم بعدم تحريف القرآن ، بمعنى آخر : اشمعنا ده يتحرف وده لأ ، وبمعنى أوضح عليا وعلى الناس اللى بيقولوا على انجيلى محرف :)
    عذرا على الصراحة !!
    بخصوص الصلب فأنا عارف حكاية شبه لهم ، فيه أصدقاء أزهريين ليا بيقولوا خدوا يهوذا بدال المسيح وصلبوه وأصدقاء بيقولوا لأ مخدوهوش .
    الفكرة ان الله حب يعاقب يهوذا الاسخريوطى على خيانته للمسيح فغير شكله لشكل المسيح وأصعد المسيح للسماء ، ويا عينى اتصلب عمنا يهوذا .
    من وجهة نظر مسيحية ، تعتبر هذه القصة قصة ساذجة ، لسبب بسيط وهو أن الأيمان المسيحى كله مقام كما تعرف على فداء المسيح ( الابن ) للبشرية أجمعها بواسطة حمل خطاياها عنها عليه على خشبة الصليب ، وكما ترى بدون الصليب لا مسيحية !!
    أنا حاسس أن التعليق طول وهيكون فيه تانى ، الى اللقاء .

    ردحذف
  17. بخصوص الاعتدال والاتيكيت ، اتكلم براحتك يا دكتور انت اكبر من كده بكتير .
    بخصوص أننا نجيب الكتب المقدسة ونشوف اعجازها العلمى أو نقارنها بالعلم للوقوف على مدى صحتها هذه طريقة ليست الا بالساذجة ، فكما أن هناك أعجاز علمى بالقرآن ، يوجد فى الكتاب المقدس بعهديه معلومات علمية لم تكن تخطر على بال بشر من قبل ، وبالتأكيد أنت تعرف هذا من قبل قراءاتك للكتاب المقدس .
    لكن هناك كاتب مسيحى أوروبى ( مبشر ) على ما أظن يعيش حاليا بالسنغال ، وكما نعرف السنغال أغلبيتها مسلمة ، لذلك أضطلع الرجل بالأمور الاسلامية وله صداقات كثيرة اسلامية ، أخرج كتابا قال فى صفحة منه أن الشيطان هو من أعلم العالمين ، ويزيد علمه على علم البشر جميعا ، فلا عجب أن يأتى أى كتاب دينى بكم هائل من الآيات العلمية ويكون مؤلفه الشيطان أو على الأقل الذى أوحى به .
    نفس الفكرة قالها على اعجاز القرآن الأدبى ، لو كنت تريد الكتاب ، وهو على ما أظن معمول خصيصا للمسلمين قل لى ، وسأتى لك برابط الموقع والكتاب لترى على الأقل كيف يفكر هذا الشخص .
    على فكرة أول مرة أسمع عن أنه يوجد طلاق باليهودية ( فى اسرائيل أقصد ) لكن هناك بعض الطوائف المسيحية لكن ليس بمصر تجيز الطلاق .
    مين نوال السعداوى دى ؟ :)
    استمتعت بالحديث معاك يا دكتور ومنتظر رأى حضرتك فى تعليقاتى التى ربما تبدو ( مش عارف ) :)
    سلااااااااااااااام .

    ردحذف
  18. @واحد من الناس
    أوك يا دكتور ، وأنا هجهز الشاى الى أن تنورنا ثانية .
    :)

    ردحذف
  19. ازيك يا محب :) ندخل في الكلام على طول علشان القصة طويلة

    هل خادم الكنيسة بيتكلم عن المسيحية ولا عن رأيه الشخصي ؟

    اذا كان عن المسحية يبقى كده كويس اني ابقى مسلم , طالما حدخل الجنة في النهاية ليه أروح الكنيسة او اسيب الاسلام و على عكس الاسلام اللي بيقول ان غير المؤمنين بيه مش حيدخلو الجنة ( بالمناسبة الانسان الذي لم تصله الرسالة غير داخل في الحكم ده ) , فيبقى مكاني كمسلم اضمن :)

    لكن المشكلة ان ده مش الاعتقاد المسيحي الحقيقي بدليل
    مرقس 16: 16 ( من آمن واعتمد خلص , ومن لم يؤمن يدن ) وطبعا مفيش مسلم بيؤمن بالصلب والفداء والتعميد فالبتالي انا مدان
    لوقا5:13 ( بل ان لم تتوبوا فجميعكم كذلك تهلكون ) والمخول بتفسير معنى التوبة في الانجيل هم اهله ولكن من المنطقي ان تكون التوبة متضمنة التوبة عن خطأ الاعتقاد ف المسيح المخلص .
    اعتقد ان نصين كفاية في توضيح المقصد . غير ان الظالمين لا يدخلون ملكوت الله , وان كل من يرى الابن ويؤمن به فله الحياة الابدية . طيب والذي لا يؤمن انه ابن ؟!!!

    *

    ردحذف
  20. @واحد من الناس
    الحمد لله يا دكتور
    أنا مش قاعد بالصدفة على فكرة على الكمبيوتر ، لكن يكاد يكون شغلنا كله عليه .
    أنا هرد أول بأول لأن حضرتك بتطول الظاهر فى الكتابة ، وعلشان كمان الرد يكون كامل متكامل .
    أستاذ الكنيسة على ما أظن كان بيقول رأيه الشخصى ، لكنه رأى مقبول فى بعض الأوساط المسيحية بالتأكيد بالذات الناس القديمة ( لأ لأ مش المستعملة ، انا قصدى حاجة تانى خالص :)
    جميل جدا الظاهر ان حضرتك استاذ فى المسيحية وأنا مش عارف ، بس أنا عاوز أوقل حاجة .
    ان كل من يرى الابن ويؤمن به فله الحياة الابدية ، الآية دى مش مفترض أننا نفهم منها أن الذى لا يؤمن بالأبن ليس له حياة أبدية ، أنا فهمت كده من اللهجة العربية بتاعة الكلام ، عموما يكاد يكون الانجيل موافقك فيما طرحته :)
    فاكر فى مرة كنا بنهزر فى ثانوى وأبلة الأقتصاد قاعدة فقالت بتقولوا أيه يا عيال ، رحت قلتلها أبدا : أنا بقولهم أنتوا هتروحوا النار حدف ، وهبقى أجيبلكم عيش وحلاوة ، وهما بيقولولى هتدخل النار بطيارة أو بقطار سريع وبرضه هنجيبلك عيش وحلاوة ، طبعا الأبلة تبعنا ( قصدى من القرية نفسها ) وفاهمة السيستم بيمشى ازاى ، فضحكت وسكتت

    ردحذف
  21. + حنسيب الناس اللي سافروا بره واللي جوه لان كل نفس بما كسبت رهينة , وسيأت يوم القيامة حيث تجادل كل نفس عن نفسها امام مالك الملك , بس متنساش ان انت اللي جبت سيرتهم الاول :)

    ** بالنسبة للنسخ انا مش بقول مين اكتر من مين , انا بقول ان المبدأ موجود في الديانتيين فيمنفعش يبقى سلاح في ايد احد اتباع الديانتيين لمهاجمة الدين الاخر بالاضافة ان النسخ مسألة ليها حكمها واحكامها واهميتها
    طيب انت متعرفش ان فيه طلاق في التوراة ؟؟!

    ( التثنية 24 : 1-3 " إِذَا تَزَوَّجَ رَجُلٌ مِنْ فَتَاةٍ وَلَمْ تَرُقْ لَهُ بَعْدَ ذَلِكَ لأَنَّهُ اكْتَشَفَ فِيهَا عَيْباً مَا، وَأَعْطَاهَا كِتَابَ طَلاقٍ وَصَرَفَهَا مِنْ بَيْتِهِ، 2فَتَزَوَّجَتْ مِنْ رَجُلٍ آخَرَ بَعْدَ أَنْ أَصْبَحَتْ طَلِيقَةً، 3ثُمَّ كَرِهَهَا الزَّوْجُ الثَّانِي وَسَلَّمَهَا كِتَابَ طَلاقٍ وَصَرَفَهَا مِنْ بَيْتِهِ، ...)

    طيب اذا قلنا ان المسيح عليه السلام اقر بانه لا طلاق الا لعلة الزنا كما في انجيل متى

    وانت قلت ان المسيح قال ما جئت لاهدم الناموس بل لاكمله

    نسمي ده تناقض ؟؟؟!!!

    طيب مفيش مشكلة احنا بنسمي( منع الطلاق في المسيحية بعد جواز الطلاق في الشريعة الموساوية , وفي البدء لم يكن طلاق على حد قول المسيح عليه السلام في الانجيل يعني مفيش طلاق ثم اقراره ثم منعه )بنسميه نسخ . هل ده كافي لاظهار المعنى ولا لا

    لو عايز ادلة تانية مفيش مشكلة بس احنا في معرض توضيح مصطلحات



    **نمسك في الجزئية اللي انت شايفها عيبه

    اه فعلا كان فيه تدرج في الحكم الخاص بالجهاد , انا مش عارف اشرح التدرج ومعناه ولا اجيبلك ايات التسامح بعد بسط سلطان الدولة الاسلامية

    طيب بما اننا متفقين ان فيه تدرج اصلا يعني مش محتاجين نثبته , نرد على التانية لانها حتنفي الاتهام من اصله


    ** { لَا إِكْرَاهَ فِي الدِّينِ قَدْ تَبَيَّنَ الرُّشْدُ مِنَ الْغَيِّ فَمَنْ يَكْفُرْ بِالطَّاغُوتِ وَيُؤْمِنْ بِاللَّهِ فَقَدِ اسْتَمْسَكَ بِالْعُرْوَةِ الْوُثْقَى لَا انْفِصَامَ لَهَا وَاللَّهُ سَمِيعٌ عَلِيمٌ (256) }سورة البقرة ودي في نزلت في المدينة

    **{ لَا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُمْ مِنْ دِيَارِكُمْ أَنْ تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ (8) إِنَّمَا يَنْهَاكُمُ اللَّهُ عَنِ الَّذِينَ قَاتَلُوكُمْ فِي الدِّينِ وَأَخْرَجُوكُمْ مِنْ دِيَارِكُمْ وَظَاهَرُوا عَلَى إِخْرَاجِكُمْ أَنْ تَوَلَّوْهُمْ وَمَنْ يَتَوَلَّهُمْ فَأُولَئِكَ هُمُ الظَّالِمُونَ (9) } سورة الممتحنة ودي نزلت بعد حروب وحروب مع قريش

    **{ وَإِنْ أَحَدٌ مِنَ الْمُشْرِكِينَ اسْتَجَارَكَ فَأَجِرْهُ حَتَّى يَسْمَعَ كَلَامَ اللَّهِ ثُمَّ أَبْلِغْهُ مَأْمَنَهُ ذَلِكَ بِأَنَّهُمْ قَوْمٌ لَا يَعْلَمُونَ (6) } والاية دي في سورة التوبة يعني نزولها كان قبل موت النبي صلى الله عليه وعلى المسيح وسلم عليهما , بحوالي سنة واحدة تقريبا يعني بعد تمام كمال سلطان الدولة الاسلامية وتطبيق كل السياسات ومعدش فيه حاجة نخبيها بعد ما تم اخضاع كامل الجزيرة العربية .
    **{ لَقَدْ جَاءَكُمْ رَسُولٌ مِنْ أَنْفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُمْ بِالْمُؤْمِنِينَ رَءُوفٌ رَحِيمٌ (128) فَإِنْ تَوَلَّوْا فَقُلْ حَسْبِيَ اللَّهُ لَا إِلَهَ إِلَّا هُوَ عَلَيْهِ تَوَكَّلْتُ وَهُوَ رَبُّ الْعَرْشِ الْعَظِيمِ (129) } التوبة . ودي ايضا جت بعد ايات القتال في النزول وده معناه حاجة واحدة ان الرحمة والدعوة بالحكمة والموعظة الحسنة سابقة للقتال ومصاحبة ليها وتالية عليه لانها الاصل , انما القتال هو لازالة سلطان الشر عن قدرة الناس على الاختيار .بدون اكراه او الزام ولو كان الاسلام اكره المصريين او اهل الشام عليه مكنتش حضرتك قاعد قدامي حاطط رجل على رجل وبتشرب الشاي وبتقولي الكلام اللي انت بتقوله :) ولا انت بقى كنت مستخبي وطلعت بعد مامشيوا :)
    انا مجبتش كل ايات الرحمة , انا جبت الايات اللي اتكلمت عن الاحسان والدعوة الحسنة بعد بسط سلطان الاسلام علشان انفي انه لما كان ضعيف كان بيتكلم بالراحة ولما اصبح قوي لم يعد هناك الا االسيف .


    وفي نهاية الجزء ده افكرك بان المسيح ما جاء ليهدم الناموس بل ليكمله ,
    صموئيل الثانى 12 : 31
    وَأَخْرَجَ الشَّعْبَ الَّذِي فِيهَا وَوَضَعَهُمْ تَحْتَ مَنَاشِيرَ وَنَوَارِجِ حَدِيدٍ وَفُؤُوسِ حَدِيدٍ وَأَمَرَّهُمْ فِي أَتُونِ الآجُرِّ، وَهكَذَا صَنَعَ بِجَمِيعِ مُدُنِ بَنِي عَمُّونَ. ثُمَّ رَجَعَ دَاوُدُ وَجَمِيعُ الشَّعْبِ إِلَى أُورُشَلِيمَ .


    يشوع 11 : 11
    وضربوا كل نفس بها بحد السيف.حرّموهم.ولم تبق نسمة.واحرق حاصور بالنار.


    جيب من القران او من تاريخ المسلمين شىء زي كده ؟؟؟!!!

    ردحذف
  22. حد الردة



    مت 10 : 34
    لا تظنوا أني جئت لألقي سلاما على الأرض. ما جئت لألقي سلاما بل سيفا.



    لو 19 : 27
    أما أعدائي ، أولئك الذين لم يريدوا أن أملك عليهم ، فأتوا بهم إلى هنا واذبحوهم قدامي.

    سفر التثنية 13(6-11)
    وَإِذَا أَضَلَّكَ سِرّاً أَخُوكَ ابْنُ أُمِّكَ، أَوِ ابْنُكَ أَوِ ابْنَتُكَ، أَوْ زَوْجَتُكَ الْمَحْبُوبَةُ، أَوْ صَدِيقُكَ الْحَمِيمُ قَائِلاً: لِنَذْهَبْ وَنَعْبُدْ آلِهَةً أُخْرَى غَرِيبَةً عَنْكَ وَعَنْ آبَائِكَ 7مِنْ آلِهَةِ الشُّعُوبِ الأُخْرَى الْمُحِيطَةِ بِكَ أَوِ الْبَعِيدَةِ عَنْكَ مِنْ أَقْصَى الأَرْضِ إِلَى أَقْصَاهَا، 8فَلاَ تَسْتَجِبْ لَهُ وَلاَ تُصْغِ إِلَيْهِ، وَلاَ يُشْفِقْ قَلْبُكَ عَلَيْهِ، وَلاَ تَتَرََّأفْ بِهِ، وَلاَ تَتَسَتَّرْ عَلَيْهِ. 9بَلْ حَتْماً تَقْتُلُهُ. كُنْ أَنْتَ أَوَّلَ قَاتِلِيهِ، ثُمَّ يَعْقُبُكَ بَقِيَّةُ الشَّعْبِ. 10ارْجُمْهُ بِالْحِجَارَةِ حَتَّى يَمُوتَ، لأَنَّهُ سَعَى أَنْ يُضِلَّكَ عَنِ الرَّبِّ إِلَهِكَ الَّذِي أَخْرَجَكَ مِنْ دِيَارِ مِصْرَ مِنْ نِيرِ الْعُبُودِيَّةِ، 11فَيَشِيعَ الْخَبَرُ بَيْنَ الإِسْرَائِيلِيِّينَ جَمِيعِهِمْ وَيَخَافُونَ، وَلاَ يُعَاوِدُونَ ارْتِكَابَ مِثْلِ هَذَا الأَمْرِ الشَّنِيعِ بَيْنَكُمْ.

    هاهي كتب الديانتيين سماويتي الاصل تتحدث عن نفس الامر واشد قوة , فلماذ يدان الاسلام وحده بما يجمع عليه الجميع .


    وعلى كل هو امر طبيعي للحفاظ على وحدة الدولة لان الدولة في الاسلام قائمة عليه , وبالتالي يكون الطعن فيه والتشويه على اهله سبب من اسباب الاضطراب الاجتماعي , ويعادل الخيانة العظمى للامن القومي .

    ردحذف
  23. @واحد من الناس
    أولا وقبل كل شىء ، عاوز أقول لحضرتك أنك عارف آيات فى المسيحية أكتر منى أو أنك بتنقيهم :)
    ثانيا : أنا معرفش حاجات كتير فى الاسلام غير اللى كان بيحكهولى زمايلى واللى كان أساتذة اللغة العربية بيشرحهولنا سواء فى المنهج أو لا ، وكمان لما كنا بنقعد فى حصة الدين الاسلامى لما كان مدرسنا بيغيب ، وكل ده غير كاف على الاطلاق فى أن أتحاور بطريقة عفوية مع حضرتك وانت العالم بأشياء كثيرة ، لكن سبب عدم فحصى للأسلام ، وعدم البحث فيه هو اقتناعى بالمسيحية كطريق الى الله .
    بخصوص الحروب اللى جت فى يشوع ، فأنا عن نفسى أطلق على يشوع الرجل الدموى فى التاريخ ، لكن فلنفترض لكام لحظة أنه أخد كلامه من ربنا وده متفق عليه فى الانجيل وان الكلام ده مش محرف ، وده انت مش هتوافقنى فيه بس فلنفترض أن حضرتك وافقتنى ، لا لا يا عم ، أنا مش هكرر الكلام ده كتير ، أنا هبحثلك عن الكتاب اياه وهجيبلك اللينك ، فيه كل الاجابات عن الحاجت دى بمنطقية شديدة ، وأنا مهما كنت مش هعرف أجاوب زيه ، ثانية لما أدورلك على النت عليه :)
    بقالى 3 دقايق بدور ولسة :)
    عموما آدى الموقع اللى جبت منه الكتاب
    http://www.one-god-one-message.com/
    ثانية أجبلك رابط الكتاب نفسه :)
    بص معلش يا دكتور الموقع مش راضى يحمل عندى ، لأن فيه مشاكل فى النت عندى ، عموما الكتاب اسمه اله واحد رسالة واحدة ، وهو الكتاب الرئيسى فى الموقع على ما أفتكر .
    حضرتك رديت رد تانى وانا بكتب ، يا حلاوة ، أنا مش ملاحق خالص :)

    ردحذف
  24. @واحد من الناس
    أول آية بتاعة جئت لألقى سيفا ليس لها علاقة بالردة ، بل بالأضطهاد اللى هيشوفوه المسيحيين من كل جانب ، المسيح كانوا الناس يحسبوه هيجى كملك ويحررهم من حكم الرومان ، لكن هو نفى الحتة دى بل وزود عليها الكلام ده علشان منقولش مقالناش ليييه ؟ هو ده تفسيرى على الآية دى ، وللصدفة البحتة كنت قريت منذ سنتين سؤال كان أثاره عمنا توفيق الحكيم بخصوص الآية دى فى جريدة الأهرام وكان بيتكلم باحترام كبير للأنجيل ولعقول الأقباط ذات أنفسهم ، فلقيت فى مجلة الكرازة الرد ، بس للأسف مش فاكر أيه الرد ده .
    كل ما يتعلق بالعهد القديم من هذه الأفعال التى لا تقبلها المسيحية اليوم ممكن أرد عليها بس ردى مش هيكون اللى هو لأنه مش عن دراسة لكن عن فهم شاب لسة معدى ال19 سنة ،يعنى مثلا ربنا استنى الشعوب الوثنية الكنعانية مدة 400 سنة علشان يتوبوا ولما ماتابوش راح حرمهم على يد شعبه القديم ، وحكاية موت الأطفال والنساء والشيوخ ، أحب أدعوك لقراءة رد الكاتب فى الكتاب اللى أشرت عليك بيه ، رد مقنع الى حد كبيييييير جدا .
    أما بقى الاسرائيليين مكانوش زى المسيحيين دلوقتى ، وممكن تقول ده نسخ ، أنا بقول ممكن مش بالتأكيد ، اليهود كانوا ومازالوا شعب غليظ الرقبة ، لذلك ترويضهم كان عاوز قسوة ، بس استنى حضرتك ده مش نسخ ، لأنه لو فيه شعب مسيحى زيهم كان مجلس الكنائس هيختار قواعد العهد القديم اللى بتتناسب معاهم :)
    بجد أنا مش عارف ومش عاوز أفتى ، اعتبرنى كنت بهزر :):):):)
    المهم ، نولت الكتاب ولا لسة ؟

    ردحذف
  25. بداية اشكر لك مشاعرك الطيبة ولكن لن يدخل احد الجنة بوجهة نظر احدنا , انها حقائق , فالمسلمون لا يؤمنون ان المسيح هو الله فالبتالي لن يدخلوا في نفس انعيم الابدي الذي جاء به المسيح لمن يأخذ صليبه ويتبعوه , نحن نتكلم عن رؤية الكتاب المقدس وليس رؤية او امنية احدنا .
    وعلى كل حقيقي اتمنى من كل قلبي ان ربنا يجمعنا كلنا في الجنة لكن امنيتي ليست مفتاح الجنة ولا رغبتي هي الطريق
    اليها فقد قلت لك سابقا انها مسألة ايمان وعمل صالح كما جاء في كل الكتب السماوية و تحتاج الى عمل وليس اماني


    ليه الانجيل يتحرف والقران لا , لان الانجيل زي مقلت اتكتب في 16 قرن ,بينما القران كتب في نفس وقت نزوله , وعلى اقص تقدير تم جمعه في كتاب واحد بعد 15 سنة تقريبا , ده ممكن يكون سبب
    لمكن السبب الاهم هو قول الله سبحانه
    ( ولو كان من عند غير الله لوجدوا فيه اختلافا كثيرا )
    لذا فالبينة على من ادعى , فلا يكفي ان تقول ان القران فيه تحريف بل ائتي بالجزء الحرف حتى نراه

    وهذا ما يمكن جمعه الان مما يدعي بعض المسلمين انه تحريف في الانجيل



    • فقد كان عيسى يقول"لاتظنوا أنى جئت لانفض الناموس أو الانبياء ما جئت لانقض بل لاكمل "متى5/17 وهذا اعتراف صريح بأن رسالتة تكملة لرسالة موسي وقد جاء عيسى نبيا الى بنى اسرائيل وليس الى العالم

    والسؤال لماذا اختلفت تعاليم المسيحية عن اليهودية , مثلا الخنزير محرم في العهد القديم فلماذا تم تحليله اذا لم يكن هناك نقض .
    • كما جاء فى متى 15/24 مانصة"ثم خرج يسوع من هناك وانصرف الى نواحى صور وصيدا واذا امرأة كنعانية خارجة من تلك التخوم صرخت قائلةارحمنى يا سيد يا ابن داوودابنتى مجنونة جدا فلم يجبها بكلمة فتقدم تلاميذة وطلبوا الية قائلين اصرفها لانها تصيح ورائنا فأجاب وقال لم أرسل الا لخراف بنى اسرائيل الضالة"وتلاحظ هنا شيئين ( لم تقل المرأة يا ابن الله كذلك حدد هو دعوتة لبنى اسرائيل فقط) فلماذا قيل هو بن الله ولماذا يؤمن به الاقباط اذا كانت رسالته الى بني اسرائيل فقط , واذا طكان هناك امر فيما بعد بان يتجه التلاميذ الى جميع الامم افلا يعد هذا تناقضا يتنزه عنه كلام الرب ( كمسلمين يمكننا اعتباره نسخ , ولكن بما انكم لا تؤمنون بالنسخ فماذا تسمونه ؟)
    • وفى متى ايضا ان قال للحواريين وخلى بالك هنا ذلك قوله لمن أرسلهم للتبشير "الى طريق امم لاتمضوا والى مدينة للسامرين لاتدخلوا بل اذهبوا بالحرى الى خراف بنى اسرائيل الضالة"متى 10/5,6 أيضا وفقط الى بنى اسرائيل
    • أحد الأغنياء إذ كان يسأل عيسى عليه السلام مخاطباً إياه (أيها المعلم الصالح) ماذا أعمل لأرث الحياة الأبدية ؟ أجابه لماذا تدعوني صالحاً ؟ ليس أحد صالحاً إلا واحد وهو الله) (مرقس 10 : 17 - 18) (لوقا 18:18) (متى 16:19) اي انه ليس الله , هي صريحة هنا بلا صعوبات اللاهوت والناسوت

    كتب متى في [ 12 : 17 ] مستشهداً بالعهد القديم ( بخصوص المسيح ) :

    ( لكي يتم ما قاله النبي إشعياء : هوذا فتاي الذي اخترته حبيبي الذي به رضيت سأفيض روحي عليه . )

    هذه العبارة انفرد متى بذكرها وهي مخالفة للعبارة الأصلية الموجودة في سفر إشعياء [ 42 : 1 ] لأن عبارة إشعيا هكذا : (( هوذا عبدي الذي أعضده مختاري الذي سرت به نفسي ))


    وانا اقول رغم ان فتاي افضل من عبدي لكن عندما يستبدلها كاتب يفترض فيه الوحي فقد يكون المعنى مقصودا لنفي العبودية وهي ما يؤمن به الملسمون في حق محمد والمسيح على السواء




    كفاية كده النهاردة علشانم انا تعبت :)

    منتظر تعليقاتك .

    ردحذف
  26. @واحد من الناس
    بص يا دكتور أنا هرد على اللى أعرفه واللى مش هعرف أرد عليه بالأضافة للى أعرفه هتلاقيه صدقنى فى الكتاب لكن أنا للأسف لسمة مخلصتوش .
    المهم سبب منطقى لعدم تحريف الانجيل ، هل الله قادر على حفظ القرآن وعلى حفظ الأنجيل مقدرش ، هل هو موبايل فى وقت يكون شغال كويس ووقت بيهنج ( حاشا لله طبعا )
    بخصوص المرأة الكنعانية وذكرك لقصتها فهذا وضح لى أن حضرتك بتقرا آيات آيات ، يعنى مش بتقرا الكتاب المقدس كاصحاحات أو كقصص كاملة الا عندما يتفق مع ما تدعيه وهو أنه محرف زى قصص القتل ، المسيح قالها كده لأنه كان عاوز يمتحنها ولو لاحظت فى آخر القصة قالها يا امرأة عظيم هو ايمانك ، اذهبى بسلام لأن ابنتك قد شفيت ، لو كان لبنى اسرائيل فقط ، كان استحالة هيقولها كده ، كمان المسيح راح السامرة كذة مرة واللى كانوا رسميا مش اسرائيليين فى الوقت ده .
    بالنسبة للشاب الغنى ليه منقولش أن المسيح كان عاوز يعرف أو يعرف أى حد ماشى معاه أنه هو الله ، كان عاوز يثير الحتة دى فى دماغ الشاب ، حاجات كتير عاوزة تتفهم !! :)
    زى ما قلت لحضرتك الكتاب اللى قولتلك عليه ده مية مية ، بس عارف أوحش حاجة فى المناظرات أو الحوارات الدينية أيه ؟ لما أنت أو أنا يعنى كل واحد مؤمن بأن كتاب التانى محرف ليه نقارن الآيات ببعض ، لأنه لو كان محرف حتة وحتة لأ ، فالحتة المحرفة بالنسبة ليا انت هتعتبرها الصح والعكس صحيح ، أنا منعنس ومش عارف اتكلم ، اعذرنى لو الحوار شد معايا المرة دى ، الكاتب بتاع الكتاب اياه بيقولك أيه : فيه 3 أنواع بيقروا الانجيل ، علشان مطولش عليك هقولك النوع التالت بس وهو الناس اللى بتقراه أصلا علشان تطلع منه أخطاء ، ودول صعب يقبلوه على أنه كتاب الله ، وأنا اعتقدت مؤخرا أن حضرتك تتبع هذا التصنيف :)
    عموما ، تحياتى لحضرتك وشكرا على الحوار الممتع ده ، مع أنى كان ليا سنتين تلاتة مدخلتش حوار أديان لكن كله ده علشان خاطر حضرتك ، لأن أنت تؤمر ، هو أحنا لينا كام دكتور يدعى اسلام طه ؟
    none :):)

    ردحذف
  27. انا جيت تاني شكلنا بقى مورناش غيرك :)

    طيب لما الانجيل يكاد يكون موافقي في طرحي , انت بتجيب كلامك منين , واذا كنت انت مش مؤمن بنصه , ازاي تطلب مني اني اصدقه يا عم مارتن لوثر الاثوذوكسية :)


    ** عدم بحثك في الاسلام بسبب قناعتك , طيب انا قناعتي ممنعتنيش من البحث لان الاشياء من هذا القبيل هي محور الحياة قبل الموت وبعده ؟


    ** لا لا انا لا انكر امكانية ان كلام يوشع من الرب لان عندنا امر من النبي اننا لا نكذب ولانصدق ماجاء عن بني اسرائيل حتى لا نكذب شيئا صادقا او نصدق شيئا كاذبا , كل سبب نقلي , ليه بيلوموا الاسلام على اشياء موجود اشد منها في العهدين القديم والجديد . فهمتني ؟؟


    **ياريت رابط الكتاب لان الموقع فيخه كتب كتيير بس انا بتحاور معاك وانت قريته يعني ممكن ترد عليا من غيره وعلى كل ارسله ليه واوعدك اقراه , بس توعدني انت كمان تقرا المصحف نفسه من غير كلام حد عنه واقرا تفاسيره , زي انا معملت , انت متخيل اني بنقي ايات , المسألة مش كده انا زمان قريت كتب كتيير عن المسيحية فقلت لنفسي طيب ما ممكن يكونوا اللي كاتبيين الكتب دي علشان واخدين موقف من المسيحية , انا اقدر اقرا الانجيل بنفسي , وقريت فيه كتيير وجدت ان الكلام حقيقي مش ادعاء برغم اني وجدت بعض المبالغات احيانا وعرض نقاط يمكن تفهمها .



    **انا ححترم فيك كلمة مش عارف , بس محاولة المعرفة واجبة على الناس اللي ربنا انعم عليهم بالعقل .


    **نؤمن نحن المسلمين ان الله عزوجل استحفظ الكتب السابقة لاهلها فضيعوا بعضها , بينما تكفل بحفظ القران ربما يكون لانه اخر الكتب ولن يأتي نبي اخر ليصحح للناس ما افسدوه .


    ** اسـألك اسئلة بعيد عن الايات اللي انت بتقول انا بنقيها

    ليه انا مشفتش مسيحي حافظ الكتاب المقدس كامل .على عكس ان فيه ملايين المسلمين ومن غير العرب يحفظوه عن ظهر قلب
    وايه اللي يخلي النسخة الموجودة في الشرق من الكتاب المقدس احق بالاتباع من نسخة الملك جيمس بتاعة الكاثوليك ؟؟ الا اذا كان فيه تعارض فعلي وبما ان نسخ الانجيل متعارضة بينما نسخ القران لا يوجد بها اختلاف بهذه الطريقة فدا ممكن نسميه ايه او نبرره ازاي



    ** انا فعلا منقتش ايات , زمان كنت حافظ حاجات اكتر من كده , بس بمرور الةوقت اكتشفت ان فيه زملاء مسيحيين كتيير عهارفين ان الشبهات اللي
    بيقولوها مردود عليها واحيانا كانوا بيبقوا عارفين انها غلط ومش موجودة في القران ومع ذلك بيقولوها ده اعطاني انطباع سىء الى حد ما عن موضوع المناظرات , يعني مثلا انت معلقتش على ايات الرحمة والاحسان بعد القتال متهيألي دي تنفي الاتهام بتاع الاجندات



    * انت صنفتني وانا وضحتلك , انا مقرتهوش علشان اطلع فيه غلطات , انا قريته علشان اعرف الكلام اللي بيتقال عليه صح ولا غلط .

    كام مسيحي قرا باي نية من غير ما يسمع كلام الكنيسة ؟؟



    تحياتي مع الشكر على سعة صدرك وقبولك الحوار

    ردحذف
  28. @واحد من الناس
    أهلا وسهلا يا دكتور ، بصراحة حضرتك منورنى
    قبل ما أقول أى حاجة عاوز حضرتك تعرف أن الموضوع ده جزء أول مش موضوع كامل ، والجزء التانى هعمله قريبا ان شاء الله .
    ثانيا : أحب أعتذرلك عن أى حاجة قد تكون بدرت منى امبارح ، أنا كنت منعنس بجد ، وأنا من ساعة ما اتولدت عصبى ، ولما كنت بتعصب كنت بسب بالدين سواء لمسيحيين أو مسلمين ، لكن تبت على ايد مدرس عربى عندنا فى البلد فى 5 ابتدائى ، لم يكن يفرق بينى وبين ولده ، وده لأنى كنت أشطر من ولده بحاجة بسيطة ، ده حتى لأنه شيخ كان بيقرا القران بالتلاوة والترنيم وأنا كنت بقلده فى كل حاجة زى تكرار الكلمات زى مثلا كلمة خالدين فيها ، كانت بتتقال فى آخر المقطع وتتقال تانى فى أول المقطع اللى بعده ، يعنى أنا متمرس على فكرة :):):)
    على ما أظن الآية كانت بتقول تجرى من تحتها الأنهار خالدين فيها ، يعنى بيقصد الجنة طبعا :)
    بخصوص قراءة الكتاب المقدس من قبل مسلم ، بالذات لو كان المسلم ده كان قارى حاجات ضد الكتاب المقدس مسبقا ، استحالة هيقدر يقراه بموضوعية ، صدقنى الكلام ده حقيقى :)
    فيه أيه تانى يا واد يا محب ، فيه أيه تانى ؟ استنى طيب لما أدور :)
    الموقع بحاول أفتحه من أكثر من متصفح ، لكن زى ما قلت لحضرتك أنا قريت منه أوائله ، وده ليه زمن ، بالتأكيد هكمله لأنه فعلا ممتع ، بس مش دلوقتى لأنى مشغولياتى كتيرة دلوقتى :)
    كمان حضرتك عارف أننى فى مجتمع عربى ، يعنى أغلبنا منزوعى العقل ، وده بيمشى مع المسيحيين زى ما بيمشى مع المسلمين ، علشان كده بنلاقى ارهاب وتطرف ، يمكن من الجانبين ، ومفيش حوار أصلا ، وحتى لو فيه حوار بيبقى حوار قرود ، حتى أنا لما حاورتك هنا حاولت كتير أبعد عن حوار القرود ، لكننى أظن أنى اتعصبت فى التعليق اللى فات :)
    لأ الموقع مش راضى يفتح من المتصفح التانى ، عموما الكتاب اسمه اله واحد رسالة واحدة ، وهو أصلا الكتاب الرئيسى فى الموقع ، صدقنى مش هتاخد أكتر من دقيقة علشان توصله .
    بس أنا المشكلة عندى ان النت بطىء ، ده أنا أصلا بكتب التعليق ده وبقسمه علشان النت يقبله :)
    نتى دلوقتى 64 كيلوبايت ، أهم على قدنا وخلاص ، ونعمة من الكلاب بتوع النت :)
    لأ خلاص أنا فقدت كل أمل أنى أجيب الكتاب بس هو عندى على الكمبيوتر ، طيب خلاص أنا هرفعه قريب على حسابى فى الفور شيرد ، وهو أصلا كله 2.4 ميجا ، يعنى مش شغلانة كبيرة :)
    أوحش حاجة فى الدنيا التأويل بغير وجه حق ، لأنه حتى الآيات اللى المسلمين مش بيؤمنوا بتحريفها يبؤلوها بصورة زبالة ( سورى فى اللفظ ) لأنه استحالة مثلا يكون الروح القدس هو النبى محمد ، انا عمرى ما هقدر اتخيلها :)
    ده كان فى كتاب قديم اداهونى ابن مدرس العربى ( زميلى ) بس لما كنا فى ثانوى بقى .
    أخيرا بقى علشان تعرف يا دكتور أنا أزاى وأمتى وفين ؟ أنا مش كاهن ولا حتى شماس وان كنت لبست مرتين تلاتة لبس الشمامسة ، فدى غلطة ومش هتتكرر تانى :) مش لسبب الا أننى غير مستحق بصراحة خدمة الهيكل ، ولا حتى اى حد من اللى بشوفهم غير قليل جدا طبعا .
    ثانيا أنا مش نفسى أبدا أبقى دينى ، أنا ليبرالى علمانى ، بس لما بلاقى حد بيحاول يتكلم معايا فى الدين هتكلم علشان بس ميزعلش ، وبصراحة الحوار مع حضرتك كان ممتع .
    قريت قصيدة مؤخرا بيقول فيها صاحبها يسوع يكره الديمقراطية ، وده صحيح فعلا لأنه لا سبيل الا الليبرالية ممكن يوصل للمسيح أو لله على اعتبار ان المسيح ليس هو الله .
    يعنى مثلا مصطفى محمود لف لف ورجع تانى ، ده رغم أنه كان فى زمن الاشتراكية ، وحتى ملحقش الليبرالية ، بس اللفة اللى عملها مصطفى محمود كانت مفيدة له كتير ، بغض النظر عن أنه أختار أى دين ، لأنه أختيار الأديان هنا فى الشرق الأوسط ، تحكمه عدة معايير وعقائد ، أنا أقول أن عقوبة الأرتداد مازالت قاسية فى القران رغم ما قد تقول عما فى التوراة والعهد القديم ، وتذكر انه نسخ عن نسخ يفرق ، رغم أن كلمة نسخ غير محببة فى الأوساط المسيحية .
    أما بقى بخصوص ابن حماس ، زكريا بطرس ، عبود الزمر ، لو ولعوا بجاز أنا ماليش دعوة ، أنا كل اللى عاوزه الناس تهدى بس علشان نعيش فى سلام ، عرضى لكتاب ابن حماس كان سياسى بحت ، وبرضه ليه جزء تانى هوضح فيه موقفى من كلامه زى الجزء التانى اللى هعمله للقمص برضه.
    يتبع لأنه قاللى مش هينفع تكتب ده كله :)

    ردحذف
  29. فى مرة أستاذ العربى فى اعدادى وكان شيخ برضه ، بس علاقتى بيه مكانتش اللى هيا لأنه كانت حصة احتياطى :) المهم قال أنه لما راح الشيخ الراوى ( من قريتنا ) أمريكا ورجع قاللى بالحرف الواحد فى نص ساعة من وعظى تحول 17 واحد من المسيحية للأسلام ، الكلام ده قد يكون مضايقا لبعض زمايلى وقتذاك ، لكننى ماتضايقتش ، بس محترمتش هذا الشيخ ، ولأسباب أخرى عديدة غير السبب ده ، يعنى فاكر فى مرة ، كنا ماشيين معاه فى الشارع ولقيت البنات بتسلم عليه ، فقعد يشرحلنا عن شنط البنات ، يعنى مؤخراتهم ولا مؤاخذة :)
    شفت أنا صريح ازاى ، ويكش تولع :):):)
    لأ أنا مش على حضرتك طبعا ، أنا على العلاقة بين المسيحيين والمسلمين ، أصلى لو مقلتش كل حاجة هبقى منافق ، وده مبحبهوش :)
    العفو يا دكتور ، صدقنى حوارك كان من أمتع الحورارات اللى قمت بيها ، بس عاوز حضرتك تعرف حاجة ، تكاد تكون انت اللى غالب فى الحوار ده بلهجة الناس البلطجية اللى مبيفهموش حاجة عن الحوار ، لكن الحوار يا أما تقنعنى يا أما أقنعك ، وده واضح أنه محصلش :):):)
    سلام بقى لأنى الظاهر كده طولت جدا :)
    ملحوظة : هجيبلك رابط الكتاب هنا فى نفس الموضوع فى أغلب الأحوال .

    ردحذف
  30. @واحد من الناس
    دكتور أنا حملت الكتاب والرابط بتاعه أهه
    http://www.4shared.com/document/mQIifHWi/_____-_______.html
    بس عاوز أقولك حاجة قبل ما تقراه ، طريقة الكاتب مختلفة تماما عن طريقة القمص زكريا بطرس ، وأعلم أن مشاعرك لن تجرح على الاطلاق من قراءة هذا الكتاب ، صدقنى هتحس ان الكاتب بيدردش معاك .
    تعرف ليه أنا مش بكرز وأبشر زى ما الانجيل أمر ؟ لأن الأنجيل بيبشر لنفسه ، كما أن الله أحب أن يشركنا فى عمله ، أنا بقى ببصلها من ناحية تانى ، وبقول أن الكتاب اللى بيعتبر مقدس وميقدرش يقف فى وش الناس يبقى مش كتاب ربنا ، وربنا قادر على كل شىء ، عموما حتة رفع الكتاب دى يعتبر تبشير ، اقتنعت بيه ماقتنعتش انا مالييش دعوة ، أنا رفعته وجبته بس لما لقيت أسألتك بيسألها كل مسلم وبكرر اجابتها كتير أو ساعات مبعرفش أجاوب عليها ، فى الكتاب ده هتلاقى اجابات كتير لحاجات بتدور فى دماغك .
    أصحابى المسلمين بيقولوا مش عارف السنة أو القرآن بتقول أنه الذمى لن يرضى عنك الا لو بقيت فى ملته وتأكد أنى بقولك أن القطعة دى مهما تكون من سنة أو قرآن هى كاذبة ، معلش على الصراحة والشجاعة ، انا ممكن يكون نفسى فعلا أن أصدقائى الأزهريين يكونوا معايا فى الملكوت ، لكن طالما هما مقتنعين بدينهم خلاص هعاملهم زى ما بعامل أصدقائى المسيحيين ، يا أما كده يا أما أنا منافق ، وشجاعتى اللى شفتها فى كلمة كاذبة ، لا تتفق على الاطلاق مع كونى منافق ، ولا أيييييه ؟؟؟

    عذرا لو كنت اتضايقت ، لكن أنا بحب أوضح الأمور على الآخر ، ويكش الحكاية تولع ، ماهيا كده كده خربانة :)
    بس اللى عاوزه منك بجد انك متضايقش من كلامى زى ما انا مش بتضايق من الكلام اللى بيقول الانجيل محرف ، ياريت تستحمل كلامى شوية .
    سلام بقى علشان أنا الظاهر كده خرفت :):):)

    ردحذف
  31. دكتور ، أنا نشرت بعد اذنك طبعا :) الحوار ده فى تدوينتين ، ممكن نكمل فيهم كلامنا لو عاوز
    الجزء الأول هتلاقيه على الرابط ده : -
    http://mo7eb-rofail.blogspot.com/2011/04/2.html
    والجزء التانى هتلاقيه على الرابط ده : -
    http://mo7eb-rofail.blogspot.com/2011/04/2_17.html
    أما بقى الكتاب فادى صفحته الأصلية ،
    http://one-god-one-message.com/free-downloads/cat_view/37-one-god-one-message-in-other-languages/39-arabic
    علشان تعرف تحمله أفضل :)
    تحياتى .

    ردحذف