الأحد، 6 فبراير، 2011

لو كنت المسئول



عبارة عن واجب ، ولكل من لا يعرف معنى كلمة واجب تدوينى ، أقوله بكل حب واحترام ليه وتهوين للكلمة طبعا مش ليه  : معلش ، أصل أنا برضه مكنتش أعرف معناها من حوالى 3 شهور تقريبا .
واجب تدوينى ده موضوع أو تدوينة على هيئة سؤال أو أكثر يقوم بكتابته والاجابة عليه مدون أو مدونة طقت فى دماغه أو دماغها أنه أو أنها يقوم أو تقوم بيه .
والشخص اللى طقت فى دماغه  وعمل الواجب ده ، لازم تطق فى دماغه برضه ، ويمرر أم الواجب ده على أم ناس تانى ، والحمد لله كنت من الناس دية .
أما المدونة اللى حطتنى فى الموقف ده هيا الأخت لولوكات أو  أم هريرة ، وهيا صاحبة مدونة المدينة الفاضلة يوتوبيا ،والواجب الأصلى هتلاقوه هنا .
ندخل بقى فى المهم : الواجب عنوانه لو كنت المسئول ، ومش هحكى كتير ، أنا هدخل على طول ، احم احم J
لو أصبحت يوما وجدت نفسك :

رئيس الوزراء :
أعمل اجتماع مع الوزراء أسبوعيا على الأقل ، ومن يتأخر هيدفع غرامة مبلغ كبييييييير وقدره ، أما اللى مش هيحضر فده اعدام طبعا J
نبحث مع بعض آخر المستجدات على الساحة المصرية ونحاول نحل المشاكل اللى ممكن تقابلنا ، وفى كل اجتماع معاهم أخليهم يحلفوا اليمين واحد واحد أنهم هيخلوا قلوبهم على مصلحة البلد .

وزير الدفاع والانتاج الحربى : -
مش هستورد أسلحة من برة ، وده لازم له تخطيط كبير جدا ، أجى أقعد جنب حفيدى وهو بيفكك لعبه ، أتعلم منه أزاى بيفكك اللعب دى وبعدين أقعد معاه تانى أخليه يباشرنى أنا وبفكك الطيارات والآسلحة والرشاشات والدبابات والحاجات التعبانة دى ، وأركبها تانى ، وهكذا ، وبعدين حلنى بقى لو فهمت حاجة . أو عرفت أعمل حاجة J
أه نسيت ، أكتر برضه من استخدام مسدسات المياة ومسدسات الخرز وبندقيات الخراطيش ، وأخليها على نطاق واسع أكتر من الأول ، لأنه ثبت تاريخيا أنها أسلحة فتاكة ، وشوفوا الشواهد التاريخية على كده فى حصيرتى عزيزة وغباشى .
                                                                                  
  وزير المالية : -
ده بقى والحمد لله أكتر واحد الشعب بيبصله بعنين مفتوحة مبتتقفلش ، علشان كده لو بقيت مكانه ، هروح لأم زينب عندنا فى البلد ، وأجيب منها خمسة وخميسة أعلقها فى رقبتى J

وزير الدولة للشئون القانونية والمجالس النيابية : -
أولا هموت شخص يدعى صفوت الشريف وقريبه فتحى سرور وذلك تفطيسا بمياه نيلنا الخالد العظيم J
وأشترى عروستين اتنين لعبة من عند عم حسانين البياع أحطهم مكانهم .

وزير الداخلية : -
أعلنها وبصراحة للشعب المصرى الفقرى ده ، البلطجية فى قهر وقمع الشعب .

وزير البترول : -
أعمل حمامات سباحة بترولية ، سمعت قريب أن وصيفة ملكة جمال العالم فى سنة قريبة كانت أنجولية ، يعنى زنجية ، شفت صورتها كنت هتهبل بصراحة ، جربى تستحمى فى حمام سباحة بترولى وانتى هتبقى زيها بالظبط ويمكن أنيل وأزفت منها كمان .

وزير الطيران المدنى : -
أحاول أكتر من عدد الطيارات الورقية ، علشان دلوقتى هيا بقيت أنسب وسيلة للطيران  الخاص بالأطفال بعيدا عن أهاليهم ، مما يجعلهم -  أقصد جميع الأطراف طبعا – يشموا نفسهم ؟ أو يشموا حشيش ، كله ماشى على رأى فؤاد المهندس .

وزير الدولة لشئون البيئة : -
ها ، طيب ، البيئة استحملت مننا كتير قوى قوى قوى ، فمش هتزعل تانى لو تقلنا عليها تانى ، ده تصريح رسمى منى بافساد أراضيكم الغالية عليكم J

وزير الشباب : -
الشباب ؟ أنت جيت فى ملعبى يا باشا ، وطبعا أنا مش عارف هعمل أيه ، بالتأكيد يعنى كنت ، أه ، هجيب عروسة صينية لكل شاب ومعاها بعض الكماليات طبعا من أوضة نوم وسفرة ونيش وشيش بيش وباقى الدومينة بقى .

وزير الاستثمار : -
لما كنت طفل كنت بارع فى عمل الموبايلات الطين ، رغم أنها مكانتش ظهرت فى الوقت ده فى مصر كلها ، لكن كنا بنعمل موبايل صغير مش تليفون كامل أما لنقص المواد الخام والمتمثلة هنا فى الطين أو لنقص العمالة للأسف ، لذلك لابد من توفير كل الضروريات لجميع أطفال مصر علشان يعملوا موبايلات زى ماهما عايزين ، علشان ميتعذبوش زى ما أنا أتعذبت ، الله كانت أيام حلوة .

وزير التجارة والصناعة : -
من أكتر الحاجات اللى بتجيب دخل جامد للبلد هيا السجاير ، هتوسع فى عمل مصانع سجاير علشان بتوع الكيف يدعولى ، كمان هتوسع فى الاتفاقيات الدولية مع مهربى المخدرات علشان الناس أحبابنا المحششين يدعولنا برضه ، وأهه الدعوة اللى فى الأرض لو كانت بحسنة فى الجنة هتبقى مية فل وأربعتاشر J

وزير التربية والتعليم : -
أول حاجة هعملها هو تغيير اسم الوزارة الى وزارة عدم التربية والتعليق J ، وهشجع الدروس الخصوصية سواء اللى فى المدارس وبيقولوا عليها مجموعات أو الخارجية ، طبعا المدرسين لازم يدفعولى اتاوة ، أمال أنت تحسب أيه يابا ؟ ده مال غلابة وهبلعه أنا فى الآخر J

وزير الزراعة واستصلاح الأراضى : -
وبما أن مشروع توشكى جاء لنا فى السابق بالخير الوفير ، وخرجنا من الوادى القديم للوادى الجديد واحد والوادى الجديد اتنين ، ومصر اتملت بالناس والزرع لدرجة أنه مفيش ربع شبر فاضى خالص ، بفكر استصلح الأراضى فى كوكب كريبتون بتاع سوبر مان ، بس طبعا قبل ما يتدمر ، علشان يطلعلنا سوبر زرع أو الزرع الخارق .

وزير القوى العاملة : -
هشوف حمامات السباحة البترولية والاستثمار فى موبايلات الطين ، واستصلاح أراضى كريبتون ، وتفكيك الأسلحة واعادة تركيبها وابعت لكل حتة زفرة شوية كلاب ، وأنام ، ولما الكلاب ينادموا عليا تانى وبصوت عالى هحاول أصحى .

وزير الأوقاف : -
ههدم كل معبد للبهائيين وكل كنيسة للمسيحيين وكل جامع للمسلمين وأبنى بدالهم معابد أو كنيسات ( أقصد الكلمة اللى جمع كلمة كنيس – معبد اليهود) لاحبابنا ولاد الناس الطيبيين اليهود

وزير الموارد المائية والرى : -
أخويا وصاحبى وصديق عمرى الكلب بتاع الزراعة واستصلاح الأراضى بيفكر أنه يستصلح أراضى فى كريبتون ، هعمل بأصلى وهو أصل كلاب طبعا ، وأطلب من بتاع الطيران المدنى طيارات ورقية علشان أحول فيها أو بواسطتها كام كوباية مية علشان يقدر كلابنا العظيم يزرع حاجة ، وآدى شعر الصابع الصغير فى رجلى الوسطانية لو عرفوا يعملوا حاجة .

وزير الكهرباء والطاقة : -
جيت فى وقتى ، قبل ما أكتب أم الموضوع ده ، كنت بسمع أم فيلم أجنبى اسمه ديد هيت أو حرارة الموتى على ما أظن ، على أم قناة أجنبية أسمها  فوكس موفيز . المهم علشان يحييوا بنى آدم من الموت كانوا بيعرضوه لطاقة هائلة من الكهربا ، أنا هعمل كده على أجدادنا من مينا وما قبله كمان ، لغاية الراجل اللى مات من شوية وبيصرخوا عليه دلوقتى  ، وكله ده علشان نقص العمالة عندنا فى مصر ، وطبعا هاخد عمولتى من وزير القوى العاملة ووزير الصناعة والتجارة والوزارات التانية المستفيدة من خطتى العبقرية دى ، احنا صحيح اخوات وكل حاجة ، بس البيزنس مافيهوش اخوات ، ولا أيه ؟

وزير الاعلام : -
فيه واحد صاحبى اسمه فشار بتضعيف الشين ، هجيبه وأجيب قرايبه كلهم من اخوات أولاد وبنات وأمه وأبوه وعمه وخاله وخالته وعمته وسيده وسته والناس جيرانهم وجيران جيرانهم وكل الهلمة دى ، واعملهم 3 قنوات رسمية يبرتعوا فيها براحتهم ، والحساب يجمع على صديقى فشار . ولا هو عاوز يتشهر ببلاش ؟ ده بعده J

وزير الخارجية : -
أنا أروح أمريكا بعد ما أخد من أوباما الجرين كارد لمدى الحياة ، وهو يحط بدالى أى حد تانى J براحته بقى .

وزير الاتصالات وتكنولوجيا المعلومات : -
سكان كوكب كريبتون  بعتولنا رسالات استغاثة كتييييييرة قوى قبل ما كوكبهم يروح فى الكازوزة ، هحاول أمنع رسايل الاستغاثات دى من الوصول فى حالة تواجدها لمرة أخرى من أى سكان كوكب آخر  ، علشان كله يشوف شغله بدون أى منغصات ، احنا أمة أهم حاجة عندها العلم والعمل ، ولا أيه ، لأ يا راجل بلاى استيشن واباحيات النت أيه ، احنا أتفه من كده بكتير والحمد لله L

وزير الاسكان والمرافق والتنمية العمرانية : -
مشروع أخويا الكلب بتاع الاستصلاح فى كريبتون هيعوز بيوت وبناء ومهندسين ومقاولين فى الكوكب الجديد ، هبعتله كام كلب من عندى ، لله وتعالى ومن غير فلوس ، كفاية بس يدينى كام مدينة ببلاش زى مدينة مدينتى كده .

وزير التعليم العالى والدولة للبحث العلمى : -
دى بجد بقى ، ورحمة ستى بجد ، طالما احنا أمة بهايم مبنفهمش فى العلوم حاجة والبحث العلمى عندنا فى العناية المركزة ، لما لا نهتم بأدب الخيال العلمى ، أنا واثق أنه هيجر العلوم والتكنولوجيا حبة حبة ، بس يا خسارة حتى الخيال العلمى عند العرب كلهم ملهوش مرتبة عالية زى ما عند الغرب وأمريكا ، بل وهناك من يحارب هذا الأدب ، بالتأكيد اللى بيحاربه قليل الأدب J

وزير النقل : -
أحاول أدى لأخويا الكلب بتاع الاعلام حاجة تحت الطرابيزة ، علشان يقول زى ما فى نكسة 67 ان المسافرين على الطرق هما اللى بيوقعوا الطرق وبيوقعوا ويهزموا برضه اعدائهم من الحشرات اللى بتشنقلهم وبتخليهم غالبا يعملوا حوادث .

وزير السياحة : -
صاحبى اللى معايا فى السكن سافر كتير شرم والغردقة عمل طبعا ، قاللى أن أكتر سياحة شغالة جامد فى مصر هيا السياحة الجنسية ، أنا بقول بدل ما ننضف تماثيلنا ونكتر متاحفنا والحاجات اللى مجايباش همها دى نعمل بارات وحانات وكازينوهات ، ونعمل مدرسة للبنات الصايعة نعلمهم فيها ازاى تجذب الزبون ، واهه كله بتمنه ، وكمان ده هيخلى التعليم يتطور كتييير قوى ، وطبعا هطلب من بتاع التعليم أتعابى ، أنا مبسبش حقى خالص J

وزير العدل : -
بلاش نتكلم هنا علشان خالى محامى وممكن بكلامى يخسر قضاياه كلها J ، دى منطقة محرمة للأسف .

وزير الصحة : -
أهم حاجة أنه يكون كمية الدم الملوث فى المستشفيات كافية ، متخافوش : كلابنا المصريين عندهم مناعة ضد الحاجات دى ، كمان أى دكتور أجنبى أو حتى مصرى عاوز يجرب دواه أو مصله الجديد على أى مريض ، عادى خالص ، كله فى سبيل تطور علم الطب  ، مريض يموت ولا علقة تفوت ، آسف قصدى اتاوة تفوت ، أنا جشع ؟؟؟ ، أه ، أنا عارف J

اوووووووه ، وبكده أكون خلصت المجلد ده ، أشوفكم بخير فى المجلد الجاى بقى لو فيه نصيب .

واللى أول مرة يقروا واجب بالشكل ده لازم يعرفوا أنى لازم أمرر الواجب ده لناس بحبهم جدا علشان أمرر عشيتهم
دعونا نختار بقى

مرمر
د/ اسلام أيوب ( حنعيش يعنى حنعيش )
أحمد شريف
شيرين سامى

فيه ناس كتير عاوز أكتب اسمها بس خايف يحسبونى بلعب معاهم ، علشان كده يا ريت كل اللى يقرا الواجب ده يعمله ، علشان المدرس ميزعلش J

مع تحياتى المحب لكم دائما
محب

هناك 10 تعليقات:

  1. السلام عليكم

    ايييييييييييييييييه ده يا محب
    ده انا قلت انك هتحب الشعب :)
    واضح انك بتحبه مووووووووووووووووووت

    ده بالشكل ده مبارك احسن بكتير ههههههه
    بس جميل انك مظبط نفسك ومجهز الجرين كارد مع اوباما علشان تهرب من الاعدام والمحاكمة والحاجات دى :)

    والله يا محب كنا محتاجين شوية الضحك دى الان


    مش عارفة انت فى بلدك ولا فى القاهرة الان بس اسألك التفاعل الجاد فى هذا الوقت بمقالاتك لنثبت جميعا ان المؤامرات اللى بتتعمل لنا مش من الشباب المصرى ولا من الشعب لكن من نظامه الفاسد
    امبارح ظبطوا متفجرات فى جامع عمر مكرم ياترى برده
    الاخوان ولا المسلمين اللى عملوها ...!!!!!!!!!
    ياريت تكتب انت كمان فى الموضوع ده وتقول رأيك كمصرى شريف

    ربنا يعديها على خير يا محب ويكون الجاى احسن لكل المصريين ونعيش شوية بكرامة وحرية وتطور

    اشكرك لاستجابتك لحل الواجب بس جامدة اوى كلمة

    طقت فى دماغة :)
    تحياتى لك اخى الكريم
    الى لقاء فى واجبات كتيييير قادمة :)

    ردحذف
  2. لولو كات أم هريرة :-

    الشعب حبيبى برضه ، بس مش ببلاش ، كله بحسابه ، وهبهدل أمه فى الضرايب :)

    بخصوص الكنيسة وتفجيرها : الخبر ده كان شبه ملتصق بخبر انفجار أنبوبة الغاز ، أنا فى الأول كدبت ودانى ، بعدين قلت الكنيسة كانت جنب الانفجار الاولانى فبالتأكيد جالها تضرر على الاقل من الموجات اللى عملها الانفجار ، ياللسذاجة .

    مكنتش عاوز أصدق اللى حصل ، احنا عشنا أيام الثورة فى حب وتآلف غير طبيعى ، نصحى على كده .

    فيه احتمال ان اللى عملها يكون مصرى ، لكنه ليس مصريا ، لانه خاين ، أما ان كان حد من برة وده المرجح المفروض كانه حققوا فى المشوار لغاية ما يجيبوه .

    أنا سمعت عن مسجد عمر مكرم ، فى الحالة دى مقدمناش غير بعض الحلول القليلة : أما انه اللى أطلق ثيران البلطجية أو أمثاله ؟ أو جاسوس دولة خارجية ، وواضح أن هما الاتنين متشابهى النوايا ، ألا وهى تدمير مصر عن آخرها .

    وبعد ،
    شكرا على الثقة المتبادلة ، والعفو من الشكر ، وأى خناقة فى استخدام التعابير الكوميدية :)

    تحياتى لحضرتك
    والى اللقاء فى الواجبات القادمة .

    ردحذف
  3. الفاضل محب :
    أشكرك وأتمنى لك التوفيق
    وسأعود للرد على دعوتك، لكن لتسامحني فالظروف لا تسمح الآن

    ردحذف
  4. حلوه أوييييييي ضحكتني مووووووت
    بدأت في الواجب بس يا رب أقدر أنشره و الوقت يبقى مناسب

    ردحذف
  5. أحمد شريف : -

    العفو يا أستاذ أحمد ، وشكرا للأمنية

    فى انتظار الواجب طبعا ، وربنا يسهل الأيام اللى جاية .

    تحياتى لحضرتك .

    ردحذف
  6. الدكتورة شيرين سامى : -

    هههه طيب كويس ، يعنى بعرف أضحك أهه

    فى انتظار الواجب طبعا

    وتحياتى لحضرتك .

    ردحذف
  7. محب
    الواجب دة تقيل قوى وعايز تفكير ادينى مهله وانا احله

    ردحذف
  8. حنعيش يعنى حنعيش : -

    ان كان على تقله فهو تقيل جدا

    أنا حليته بعد ما اتمرر ليا بحوالى 3 أسابيع على الأقل .

    فبراحتك على الآخر يا دكتور .

    تحياتى لحضرتك .

    ردحذف
  9. شكرا يا محب على الواجب
    بس بجد صعب اوى اكون فى هذا المازق الشديد
    لكن باذن الله ربنا يدبر واقدر احله لانى غير مؤهله نهائى لهذا العمل بس امهلنى بعض من الوقت لانه طويل قوى ومش سهل خالص مالث

    اقعد بالعافيه

    اعتقد بعد ختامى بكلمه اقعد بالعافيه اثبت لك انى غير كفء لهذا المنصب هههههههه

    ردحذف
  10. مرمر : -

    العفو ، على أيه ، دى حاجة بسيطة جدا :)

    ولا صعب ولا حاجة ، انتى اتكلمى براحتك وأنا هدافع عنك ، بس أول ماحد يجى هطير وأقول يا فكيك :)

    الله يعافيكى .

    أهه ردى عليكى برضه لا يخول ليا على الاطلاق انى ابقى وزير ، بس هو مين أحسن منى من الوزراء الحاليين أو اللى قبلهم :)

    تحياتى لحضرتك :)

    ردحذف