الثلاثاء، 25 يناير، 2011

للمسيحيين فقط ، بخصوص المظاهرات

أنا قريت فى الفيس بوك نقاش محتدم بين بعض أعضاءه المصريين المسيحيين ، النقاش عبارة عن واحد وهو صاحب صفحة مليون مسيحى عربى يحبون الرب يسوع جايب صورة كاتب فيها الايتين دول من الانجيل

لتخضع كل نفس للسلاطين الفائقة
لأنه ليس سلطان الا من الله
والسلاطين الكائنة هى مرتبة من الله
حتى أن من يقاوم السلطان
يقاوم ترتيب الله والمقاومون 
 سيأخذون لأنفسهم دينونة
( رسالة رومية 1 : 1 و2 )

فيه حد رد وقال السلاطين اللى من الله دول يقصد بيهم البابا شنودة ، مش حسنى ، وواحد تانى قال طلب الحقوق مش غلط ، عملها قبلنا بولس الرسول والبابا أثناسيوس (وأنا أضيف المسيح طبعا   ، لما قال للجندى لماذا لطمتنى ، أهه يعتبر طلب حق ، حتى لو كان طلب سلبى )
أنا عاوز أقول للى كتب الكلام اللى فى الصورة حاجة : ومين قال أن أحنا هنقاوم السلطات ، احنا بس هنطالب بحقوقنا ، وطبعا حقوقنا دى مشروعة .

وفى صورة تانية مكتوب عن البابا شنودة :
أطالب المتظاهرين بالتهدئة وعدم التجاوز

يعنى معنى كده أنه مقالش محدش ينزل المظاهرة زى ما تردد بين الأوساط القبطية الكام يوم اللى فاتوا ، بس هو طلب الهدوء وعدم تجاوز الأخلاقيات العامة الواجب توافرها عند المظاهرات والوقفات السلمية .
يبقى فين الغلط بقى ؟

يا شباب أنا كنت قلت قبل كده ، المطالبة بالحقوق مش حرام ، بس تكون بصورة لائقة ، أنا كنت عاوز أنزل بس مفيش فى أسيوط حاجة ، وكمان خايف لو كان فيه يكون حرق وتكسير من قبل المتظاهرين ، فهذا هو السيناريو المشهور فى سينيما المظاهرات المصرية .

احنا مش ضد ريس ولا ضد حكومة ، أخنا عاوزين بس حقوقنا ، حتى لو كان الشيطان هو اللى هيديهالنا ، بمعنى أن لو الشيطان هو اللى ريس علينا ، مش عايزينه يتنحى عن الحكم ، غير اذا ماديناش حقوقنا ، لكن لو أدهالنا يبقى أهلا وسهلا بيه ، ونضربله تعظيم سلام كمان .

يا ريت يا شباب اللى ينزل المظاهرات ، ينزل وهو حاطط فى دماغه حاجة هامة جدا ، أن أى تخريب وتدمير ربنا هيحاسبه عليه ، وخلونا متحضرين شوية ، ان مكانش فى علامنا وتعليمنا  ، يبقى فى مظاهراتنا . 

مع تحياتى محب روفائيل
الله معكم يا شباب



هناك تعليقان (2):

  1. يا محب

    خلاااص الناس دماغها بقى فاضى

    سلاطين كمان !!!!!

    طيب (:

    شوف دة رأيى ان المطالبه بالحقوق مش عيب بس الطريقة

    بس عارف هنا فى مصر بيعتبروا اى حد محترم فى طريقة كلامه و هادى فى مطالبه

    دة قليل الحيلة

    مش بيعتبروه محترم
    انا مش بقول نبقى همجيين بس بوضح الصورة

    و ربنا مع كل اللى نزله

    و ربنا يسهل الحال على يوم 27 هكون فى القاهرة

    ردحذف
  2. رامى

    طيب ليه ؟

    علشان طول عمرنا بنطلب باحترام وبصحافة واعلام ومحدش بيسمعلنا

    يشربوا بقى .

    أنا اخواتى قالولى تعالى القاهرة ، بس طبعا لو كنت رحت كنت هنزل المظاهرات ، ولو مكنش الأمن هيموتنى ، كانوا أخواتى قاموا بالواجب :)

    ربنا يستر .

    ردحذف