الخميس، 13 يناير، 2011

من غيرك صعب الطريق




اخطى وملكش دعوة
اعصى متخافش عدوى
هيا مرة ومتخافهاش
وبعدها الله هيغفرلك
هيا متعة ومتسيبهاش
يلا بقى يخرب بيت أهلك

أه منك يا شيطان
وأه منك يا خطية
ازاى لدلوقتى عايش فى هوان ؟
وربى خلص كل البشرية .
ازاى استنى ده بالمجان .
ينفع أخلص ، أروح فردوس .
يبقى لازم أبعد عن ابليس .
ولكل خطية ومتعة زايلة أدوس .
لكن مين يدينى القوة ؟
مين يدينى الصبر والاحتمال ؟
الروح القدس اللى ساكن جوة ؟
ليه محاسهوش ، ليه مش ع البال ؟
ليه معرفوش ، هيا معرفته محال ؟
ليا يا رب أنا ضعيف ؟
ليه يا رب أنا بخاف ؟
ليه بعيد عنك يا رب ؟
وانت بتحاول تقرب كأب ؟
ليه ؟ ..... ليه يا رب ؟

ليه يا رب عن طريقك عازف ؟
ليه مش عايزك ؟ ليه مش عارف ؟
ليه على طول حيران وف ضيق جارف ؟
ليه حاسس بهوان وفى الضلمة عاكف ؟

ينفع تيجى ليا تنور ؟
ينفع تجعل دنيتى نور؟
ينفع يا رب بالتأكيد .
لو كان سور وواحد قصير .
هتطوله ، ويعدى السور .
لو كان واحد بيعدى طريق عصيب .
وفجأة لقى نهر كبير .
هتخليله ضيقته صليب .
يعدى على الخشبه للضفة بخير .

انت يا رب لا بتنسى ، ولا بتقسى .
ليه مخلينى مش حاسس بيك ؟
يمكن دى حكمة منك انت .
بس أمنياتى وفهمى يا رب عليك .
متسيبنيش يا رب لوحدى .
يا رب أنا فهمى أنا على قدى .
وحكمتك عليا مستعصية الفهم .
وكمان على ذوى العلم .
وده بيخلينى مش مطمن فاتر .
 حاسس انى حياتى أنا خاسر .
يمكن حاجات غلط عنك فاكر .
تعالى حوشها ولتنوير حياتى بادر .
يلا يا رب ده انت هو القادر .

تاه الطريق منى ؟ مش دارى .
تهت أنا من الطريق . ولا أبالى .
المهم أرجعله أنا تانى .
يمكن ينفع سهر ليالى ؟
مش ممكن من غير يد الله .
ازاى أقدر أعمل حاجة بسواه .
هو الآمر ، هو الناهى .
لانه عارف طريق الحياة .
وبنفسه هو الطريق .
لكن فى عقلى تشويش وضيق .
بيخلى رادارى تالف .
ولحياتى ونجاتى مش عارف .
وبقيت مع جو الخطية متآلف .
ليه طيب ؟ ليه تعبان ؟
ليه طريقى الصح مش راضى يبان ؟
ليه سايبنى يا رب ده أنا غلبان ؟
ليه واخدانى الدنيا من الحنان ؟
ايه الحاجة الحلوة فيها ومخليانى بعيد ؟
هى حاجة حلوة أه ، بس مش جاعلانى سعيد .
يا ريتنى عن طريقى ده أحيد .
بدل ما يجى يوم الحزن ...
يوم البكا ..... يوم التعديد .

مع تحياتى : محب روفائيل

هناك تعليقان (2):

  1. السلام عليكم
    قدتكون أنا بالنسبة لك أكثر قرباً ..تعرفت على أكثر
    وشاهدت حياتى عن قرب...
    أنا أيضاً أريد أن أعرفك أكثر ..وأكون منك أقرب
    وأتعرف ملامح حياتك وفكرك ..لنكون أقرب

    تقبل تقديرى واحترامى

    ردحذف
  2. محمد الجرايحى : -

    يسعدنى جدا سيدى كل ما قلته .

    بالمناسبة ، أنا لست من أولئك الناس الذين يعرضون دينهم وأشعارهم وخواطرهم الدينية على الملء كنوع من الخناسة الخاصة ببيع العبيد زمان .

    بهذا أسفه من قدر دينى ، وأيضا الى حد ما لا أحترم حرية القارئين وأغلبهم مسلمين ، لكن أستاذى الفاضل ، عملنا حملة ، وكتبنا أكثر من ألف جملة ، وهناك من كتبوا الكثير ، ولم يسمع لنا أحد .

    لم أجد بدا من أن أعقد هدنة حتى يرجع الكلام الذى يتذوقه القارئون أجمعهم ، فأرجع وأكتبه .

    هذا يجعلنى أتأسف لكم جميعا .

    شكرا لحضرتك

    ردحذف