الأربعاء، 12 يناير، 2011

صلاة من أجل مصر ، ومن أجلى


1 – سامحنى على خطاياى

مغلبنيش انسان ولا حتى حيوان ، بل غلبنى شى .
وبضعفى الآن حاسس بالهوان ، أه لو مكنتش حى .

يا ريتك يا رب ماخلقتنى ، علشان متتلقاش منى الخطايا .
أنا حاسس يا شر انك خنقتنى ، موتنى وبياخدوا  فيا عزايا .

على فكرة أنا مش خايف م العذاب ، بس خايف من مشاعر الله .
ازاى أعيش خادع  وكداب ، وهو يقولى انت انسان انا ساكن جواه ؟

مظنش انه يستاهل كده منى ، بس أنا مش عارف هعمل أيه .
لا ينفع أقوله سامحنى لصغر سنى ، ولا أقول معلش ومش عارف أيه .

أنا عارف انى خاطى ، من رجلى لحد راسى .
لكن ماليا يا رب غيرك ، ووحده كتابك ميراثى .
هل أقدر أستخدمه ، وأنا خاطى وأنا عاصى .
يمكن أرجع اليك ، وبعدى عنك يجافى .
أيوة يا رب ، طريقى مليان أشواك وأنا حافى .
هو أصعب درب ، وعايز أمشيه ليك فعافى .
انت الحب ، اللى هيخلينى ع الشوك أدوس.
يمكن أضعف ، يمكن أسقط ، لكنك ايسوس بى اخريستوس .
هتيجى بسرعة ، تحملنى على كتفك ، وبرجلك للموت تدوس .

أنا كل اللى محتاجة من عندك بعض القوة وبعض السند .
علشان أكمل الطريق ، واجى لعندك ، ومروحشى لحد .
حتى الشكوى ، حتى الكلمة ، هقولهالك ومحدش يسمع .
المهم يا رب بسرعة ، تيجى تقوى ، تنضف عين تدمع .
تيجى يا ربى تعرف ولادك الطريق ، وليهم فى الطريق تجمع .
لاننا تهنا وراح الدرب ، ومن هنا والطريق بقى صعب .
يمكن نضعف ، يمكن نسقط ، بس انت هتساعدنا يا أجمل أب .
                                                     


2 – أدعنى فى وقت الضيق ، أنقذك فتمجدنى

مستنيك يا الهى تجينى ، تحوش الكرب ، تبعد الضيق .
مستنيك يا الهى تحيينى ، تبقى ليا أجمل صديق .

مد يا رب ايدك ، ولادك محتاجينك .
الشر بيقول أنا سيدك ، فمتتأخرشى عايزينك .
الشر انتشر وبيحارب ، بيخلى أولادك خايفين .
بيقول الشر لولادك ، يابنى انت وهو : الهك فين ؟
اظهر ، اعلن عن نفسك بوضوح .
اظهر ده ولادك لبسوا مسوح .
اظهر لولادك يا أغلى مسيح .

تعالى حارب عننا ودافع .
يا رب كل شىء جربناه مش نافع .
تعالى قبل ما تشوفنى يا رب لراية الاستسلام رافع .
تعالى انزع الضيق والكرب ، نحن نصمت وأنت تدافع .
تعالى يا رب وانهى الحرب
اللى هتضيعنا وتضيع مصر .
وهتعصرنا أصعب عصر .
وهتمطرنا بنار ارهاب .
وهتعيشنا أيام عذاب .
تعالى يا رب اتفتح الباب .
تعالى يا رب واجعلنا أحباب .

يا رب حافظ على مصر حبيبتى .
ده انت اللى قلت : مصر دى شعبى المبارك .
يمكن بلدى مش عارفانى .
مش فاكرانى .
أنا جدى حارب أربع حروب .
وكله ده علشان خاطر مصر .
اتطوع فى الجيش يروح ويجوب .
يصلح مدافع ودبابات .
كان بيحب بلده بصحيح .
واللى خلف ممتش .

يا رب ، انزع عن مصر الكره اللى فيها .
وازرع الحب من جديد .
وامنع الحروب من معرفة الطريق ليها .
وخلينا مع بعض جزيئات حديد .
نعرف ندافع عن كل واحد فينا .
اللى يمس واحد بس ، كأنه مس عنينا .
ده الحب علمهولنا .
لانك أحببتنا أولا وقلت : من يمسكم يمس حدقة عينى .
أنا الهك وانت ابنى .
لا تخف ، ولا ترتعب ، لان الرب الهك معك حيثما تذهب .
فيارب لينا حقق وعدك .
واملى عينينا من نور مجدك .
وانفخ في روحنا بمحبتك .
يمكن نعرف كلمتك .
نرجع ليك كلنا وبقوة .
ونكون لك ابن وابنتك .

اظهر العدل فى مصر يا رب .
شعبك يعرف انك مش ناسيه .
ولو اتكلم اعدائك كدب .
هنقولهم ربنا مينساش حد .
حتى لو نسيت الرضيع الأم .
انت هتيجى بسرعة ، تضمد جراحنا ، وكلنا ليك تضم .

مع تحياتى : عبدالله محب روفائيل .

هناك 3 تعليقات:

  1. ربنا يحفظ مصر و المصريين و ينجينا من كل شر
    تحياتي ليك

    ردحذف
  2. أنا مقدرتش أكتب حاجة بعد اللى حصل تانى ، فكتبت الصلاة دى ، عل الله يقبل الدعاء .

    بخصوص المعتقدات المسيحية اللى موجودة فى القصيدة ، لو كنت مسلم متدقش عليها ، لانى مش مستعد أغير حاجة لا دلوقتى ولا بعدين .

    أنا آسف بجد على الجملة الأخيرة .

    عموما يا مصرى مهما يكون دينك ، ومهما تكون لغتك ، وجنسك ، صلى لالهك اللى بتعبده ، أنه يحوش عن مصر .

    قوله يا رب اتدخل ، وابعد عنا الدسائس اللى بتجيلنا من كل حتة .

    قله يا رب نضف الانترنت اللى هيودى مصر فى داهية .

    قله يا رب اختار رجال دينك الصالحين ، علشان يعرفونا صحيح الدين والكلمة دى بالذات للمصريين اجمعهم مش لحد بعينه .

    قله يا رب مصر ذكرت فى الانجيل ....... مرة
    / قله يا رب مصر ذكرت فى القرآن ..... مرة .

    يا رب عشان تكريمك لاسم مصر ، اكرمها واكرم أهلها .

    حوش الغمة عنها ، ودافع عنها .

    لك الله يا مصر

    لك الله يا مصر

    لك الله يا مصر

    ردحذف
  3. شيرين سامى : -

    ليس فى مقدورنا الآن يا دكتورة الا ان ندعى الله أن يحفظ مصر

    لان كل المحاولات باءت بالفشل :(

    تحياتى لحضرتك

    ردحذف