الاثنين، 3 يناير، 2011

حتة لحم مرمية


فى مرة رحت مع أبويا للجزار
اشترينا لحم بدن وباقتدار
أيام ما كان اللحم رخيص
وقبل ما يولع نار
لما غلى اللحم قالوا
يكفى لحم الأقباط
هناكله وبدون رحمة
ولحمنا بقى عليه زحمة
م القاعدة والأمن والارهاب
شفت حتة لحم عند الجزار
كانت لحمة حلوة جدا
ومفيش حاجة تساويها ندا
وبعد كده اتحرم علينا اللحم
واتحرم عليهم برضه
فكروا فى لحم أرخص ياكلوه
ملقيوش غير لحم الاقباط ويعذبوه
يحرقوه ويسحلوه ويفجروه
شفت بعينى محدش قاللى
لحم الاقباط بقى رخيص تراللى
كنت قاعد على الكنبة وباكل
جه ابن عمى يتفرج جنبى
استغرب من فتحة نفسى
قلتله يا ابنى أنا جعان
وأنا مأكلتش من زمان
جه كام كليب فى التليفزيون
وكلهم مشاهد للانفجار والضحايا
شفت مصابين فى المستشفى راقدين
شفت أطفال وشفت عواجيز وحريم
وأول ما شفت حتة لحمة
قلت الارهاب جعان للحم وبياكل
أنا كنت باكل مكرونة وبطلت اكل
نفسى انسدت يا جدعان
حتة لحمة وشايلها واحد
بيحطها جنب ودن راحت
ويحط جنبيها الراس
وبعد شوية لقى نص رجل
ومن تشويهها الفظيع
معرفش هل دى لست ولا راجل ؟
أنا ضد الارهاب يا ناس
أنا ضده لو حتى أنا وحدى
يلا اديكو معايا نحلف بالراس
نطرد الارهاب ده من بلدى
وبدل ما نقول مسلمين وأقباط
ياريت تفكروا فى حاجة تجدى
يلا بينا يا جورج وطه ويا مريم ورحاب
عايزين نرفعها عالية بتحدى
احنا كلنا ضد الارهاب
وضد اللى بيتشدد له كمان
أنا قلت اللى فى نفسى خلاص
أنا قلته ليكم ولكل الناس
لو سمعتولى خير وبركة
لو مسمعتوليش روحوا كلوا أناناس
وخليكم مطأطأين الراس
لانكم مصريين معرفتوش تحموا بلدكم
لا أنتم ولا الحراس
وهما فين الحراس ؟
سؤال محددة اجابته سابقا
سايبينا وكل واحد فيهم هايم عاشقا
لمناصرة النظام والحزب اياه
أما الشعب فالشرطة فناسياه
أما حقهم فسايباه
واحيان كتيرة واخداه
عموما أنا عملت اللى عليا عليا
والباقى على الله
وعليكم يا مصريين .

مع تحياتى : المحارب ضد الارهاب
محب روفائيل

ليست هناك تعليقات:

إرسال تعليق